Купуваат облека, ја носат за излегување со етикета, па ја враќаат - да, и ова е реалност во земјава

За време на епидемијава, ретко си земам за слобода да седнам да испијам кафе во кафуле или да јадам во ресторан. Едноставно, не ми е природно и пријатно.

Се охрабрив неодамна да седнам на пијачка со пријателка во надворешниот дел на едно од популарните кафулиња во Скопје, во некое бош време во сабота – 19 часот.

Супер беше, празно и тивко, сè додека во 21 часот не се создаде таква гужва од млади, слободни и безгрижни лица кои уживаа во групи од 10 луѓе на маса додека менаџерот одеше од маса на маса и ги гушкаше познатите прашувајќи дали е сè во ред.

Бев шокирана од тоа како светот функционира нормално, додека јас навистина сум загрижена за здравјето на блиските и се гледам со неколку пријатели на отворено на далечина, со сопругот и родителите.

Но, да преминам на главното. Немав избор, па морав да отидам во тоалет. Се протнав низ гужвата со маска (а, сите ме гледаа чудно, дури и да ти стане непријатно) и стигнав до тоалетот каде што чекав ред.

Две девојчиња стоеја пред огледалата се шминкаа и си ги поправаа фризурите, кога забележав дека на блузата на едната девојка сè уште стои белешката и етикетата од брендот на продавницата.

За момент помислив да ѝ споменам, кога истото го забележав и кај нејзината пријателка, па сепак се решив да премолчам, бидејќи колкава е веројатноста ова да не е намерно?

Иако сум слушала честопати за тоа дека постојат девојки кои купуваат облека, ја носат, а потоа ја враќаат во бутиците – не ми се верувало.

Сè почеста е оваа појава секаде во светот, а особено на Балканот и Русија. Девојки во потрага по внимание на социјалните мрежи, се сликаат со облека од скапи брендови, во скапи автомобили со чевли и чанти кои не ги поседуваат.

Неодамна, имаше една дискусија на Твитер на оваа тема за девојките во Србија. Некои од коментарите беа:

„Изнајмуваат фустани за да излезат во град.“

„Денес може да се купи буквално сè. Во времето кога јас бев девојка мораше да научиме како треба да се носиме со себе и да работиме на себе. На никого веќе не му е гајле за убавината на душата на луѓето.“

„Во Белград одамна постои еден старо-нов тренд: место каде што кога треба да одиш на свадба ќе те нашминкаат, дотераат и облечат во брендирани алишта, со скапа чанта и ќе ве испратат со такси на веселба. Таму ќе бидеш вистинска кралица и ќе направиш илјада селфи. Следниот ден ќе вратиш сè назад. Неколку стотици евра.“

Нема ништо лошо во изнајмување облека која веќе никогаш нема да ја облечете, но најчесто ова не е целта на девојките.

Во Русија постојат агенции кои нудат да се сликаш со приватни авиони, брендирана гардероба, луксузни часовници, и изнајмуваат фотограф кој ќе ви направи одлични фотки.

Далеку од тоа дека треба да осудиме некого кој изнајмил облека, спорно е повеќе лажната слика која луѓето ја креираат за себе на социјалните мрежи.

И додека ни е важно што ќе облечеме, па се служиме со разни трикови за другите да си речат „Еј, види оваа богата е!“ добро би било да застанеме и да се освестиме за реалноста и да го промениме она што не ни се допаѓа.

Денес илјадници луѓе низ светот имаат лажна претстава за животот и реалноста токму заради лажната слика креирана на социјалните мрежи.

Да не дозволиме ова да биде пример за идните генерации...

©CRNOBELO.com Забрането преземање и копирање. Крадењето на авторски текстови е казниво со закон.

Е. П. | Црнобело / фото: depositphotos.com