Бидете нежни и трпеливи со другите, не сте изоделе ниту чекор во нивните чевли

Сликајте се повеќе со саканите. Кажувајте почесто те сакам. Впрочем, кажувајте им секој ден – те сакам. Не си легнувајте налутени. Нека добрина и љубезност ви го преплават срцето и душата. Толку многу што таа ќе се излева од вас и ќе се рефлектира врз другите кои ќе учат од вашиот пример.

фото: pixabay.com

Бидете трпеливи со себеси, но и со другите. Гледате само една мала сликичка за личноста пред вас. Не сте изоделе ниту чекор во нивните чевли и не знаете какви темнини се кријат во нивната душа. Лесно е да се биде безобразен и надмен. Тешко е да се остане приземјен и љубезен.

Слушајте внимателно за да ве сослушаат и вас кога ќе ви дојде редот да зборувате. Подарувајте без причина. Не чекајте родендени, годишнини, поводи, празници. Луѓето ги радуваат деталите, ситниците, вниманието. Навистина, најважно е подарокот да биде од срце.

Не правете го она што не сакате да ви го прави некој вам. Чистата совест е најмеката перница. Радувајте му се на секој ден, сончев или дождлив. Тука сте, живи сте, дишете, тука се и вашите сакани. Здрави сте, што може да посакате повеќе?

И сакајте. Сакајте силно, сакајте со цело срце. Себеси, ближните, другите, природата. Наместо омраза подарете љубов, животот е толку многу краток.

Еден ден ќе се разбудите во телото на старец. Лицето ќе ви биде продлабено со брчки, кожата свисната, а коските крцкави и уморни. Но, доколку со насмевка се присетите на сета убавина која сте ја виделе, почувствувале и подариле во животот и ве преплави љубов и нежност, знајте дека вашиот живот не бил залуден.

Содржината и ставовите изразени во авторските текстови и колумни претставуваат лични ставови на авторот и не мора нужно да ги одразуваат ставовите на редакцијата на порталот CRNOBELO.com

©CRNOBELO.com Забрането преземање и копирање. Крадењето на авторски текстови е казниво со закон.

(О)Милена | Црнобело