Нема фајде од цвеќиња после смртта, носете им ги на саканите додека се живи

Нема фајде од цвеќињата кои ги носиме на гробовите. Знам дека звучи грубо и безнадежно, но таа е вистината. Да го искорнам срцето од градите, нема да ги вратам саканите. Да земам да легнам до нив, тие нема да станат од земјата. Ништо нема да ни ги врати.

Но, тука ни се спомените. Тие нè топлат во деновите кога се вовлекува студенило во душата. Кога наздравуваме со нивниот омилен пијалак, споменувајќи ги на глас.

Кога ги правиме нивните омилени десерти, пробувајќи со слаткиот вкус да ја избришеме горчината во устата. Тука се саканите, на сите стари фотографии во албумите и оние што грижливо ги чуваме во кутиите од бонбониери.

Тука се милите, во секое ќоше од мојот ум, им се навраќам кога сум среќна, кога сум тажна, со мислата „Ех, да беше тука … да можев да те гушнам само уште еднаш. И да ти кажам колку многу те сакав“.

И затоа велам, нема фајде од цвеќиња кога веќе си заминале. Носете им ги додека се живи. Подарувајте додека сè уште може да ги мириснат. Слушајте ги по неколкупати во денот.

Сакајте ги со дела, но не заборавајте и на зборовите, бидејќи и тие се подеднакво важни. Кажувајте „те сакам“ колку што е можно повеќе и почесто.

Гушкајте ги до крцкање ковчиња. Смејте се почесто. Фотографирајте се. Еден ден ќе ви биде криво зошто немате повеќе заеднички фотографии. Поминувајте повеќе време заедно. Макар и во расправија. И тоа ќе помине. Сè додека сте заедно, ќе помине сè.

Кога саканиот ќе замине, не поминува. И ниту еден цвет нема да ја направи разликата.

Содржината и ставовите изразени во авторските текстови и колумни претставуваат лични ставови на авторот и не мора нужно да ги одразуваат ставовите на редакцијата на порталот CRNOBELO.com

©CRNOBELO.com Забрането преземање и копирање. Крадењето на авторски текстови е казниво со закон.

(О)Милена | Црнобело / фото: depositphotos.com