„Леле види ја, има мрсен стомак“ – кажа мажот со стомак до заби и чорапи несменети 3 дена

Маживе малку како да претераа во последно време со следење на светски фитнес инфлуенсерки со фотошопирани слики до бесвест.

Со нив се будат со нив си легнуваат, па случајно паднаа во заблуда дека така треба да изгледа и „реалната“ нивна жена.

И немам ништо против така да изгледа некоја жена, секоја чест на сите оние жени кои покрај сите дневни обврски околу кариера, деца, дом, успеваат да изгледаат беспрекорно, но сепак маж кој има далеку над 100 килограми, огромен стомак и заборава дека е време да се избања и да исече нокти, да коментира и да очекува дека покрај себе треба да има жена со изглед на совршена Барбика малку ми е бесмислено.

И ајде да стануваше збор за некој Кен со стомачни мускули, дотеран, напарфемиран, па да има високи критериуми и очекувања.

Но, овој, извинете на речникот „небањатиов“ сака покрај себе да има фитнес ѕвезда.

Како Инстаграм ги стави во заблуда ваквите мажи? Како Инстаграм направи да заборават да ја ценат својата реална жена, што спие до нив и ги слуша како ‘рчат секоја ноќ?

Со своите неумесни коментари ѝ ја нарушуваат самодовербата, прават таа да мисли дека не е доволно добра, прават да има несигурности затоа што на нозете има ронка целулит, а на стомакот стрии од породувањето.

И ваквите мажи кога веќе имаат така високи критериуми за својата партнерка, треба да погледнат профили и од некои машки фитнес инфлуенсери, па потоа малку да се проанализираат во огледало, па да си постават некој критериум за себе.

Во исфлекани пижами, со чипс на стомакот и неизмиени нозе по работа додека „листаат“ Инстаграм, навистина немаат право на вакви сурови споредби и несоодветни коментари.

Содржината и ставовите изразени во авторските текстови и колумни претставуваат лични ставови на авторот и не мора нужно да ги одразуваат ставовите на редакцијата на порталот CRNOBELO.com

©CRNOBELO.com Забрането преземање и копирање. Крадењето на авторски текстови е казниво со закон.

С. С. | Црнобело