Не е срамота да си купиш гаќи 3 за 100 од пазар - срамота е да купиш кабриолет, а немаш за регистрација

Не е срамота да купиш парфем на точење, памучни гаќи 3 за 100 денари или пешкири со купони за попуст од локалниот маркет. Срамота е да немаш, а пред луѓето лажно да се претставуваш како Мистер Џек. Од каде оваа потреба? Зошто толку патење од комплекси?

Води луксузен животен стил, чиниш прво колено на кралицата Елизабета е, ама нема пари да си ги плати сметките и основните работи за живот.

Се фали како си купил кабриолет, а нема пари да си го регистрира и бара милостина. Се дотерал како од моден магазин, а оддолу чорапите скинати му се.

Живее парада за јавноста, а дома едвај крај со крај сврзува.

Се фали со раскош, а банкарското салдо му отишло во минус за три наредни генерации.

И во ред е да немаш. Не е срамота да немаш. Многу луѓе немаме за животен стил кој може да се нарече пристоен. Таква ни е државата, со многу работа малку може да се постигне.

Но, не е во ред да немаш, а пред луѓето да се претставуваш како Мистер Џек.

Од каде оваа потреба? Зошто толку патење од комплекси?

Зошто не сме природни, искрени и отворени со луѓето? Зошто сакаме да прикажеме лажна слика од себе?

Па, таков е животот, некогаш имаш, некогаш немаш и не е срамота, сè додека чесно работиш.

Не е срамота да си купиш патики од пазар, не е срамота да кажеш дека пазариш на акција во маркет, не е срамота да споделиш дека годинава немаш финансии за да си дозволиш одмор.

Не е срамота да жртвуваш одредени работи во име на задоволување на основните потреби. Не е срамота да купиш парфем на точење, памучни гаќи 3 за 100 денари или пешкири со купони за попуст од локалниот маркет.

Срамота е да се срамиш од тоа што си или од ситуацијата во која се наоѓаш. Срамота е пред луѓето да се претставуваш во лажно светло, а дома да трпиш во име на тоа.

Срамота е да чувствуваш дека не си доволен таков каков што си за да бидеш сакан, ценет, почитуван и да чувствуваш дека мораш да лажеш пред народот дека си нешто што не си.

Срамота е да глумиш лудило и да ги потценуваш другите, а притоа самиот си во многу полоша ситуација од нив.

Срамота е да ги злоупотребуваш добрите луѓе околу тебе во име на некои твои лични себични цели за да креираш лажен имиџ.

Срамота е постојано да се ставаш себе на прво место и да сметаш дека туѓите животи не се важни, важен е само твојот и сите треба да работат во име на подобрување на истиот.

Срамота е да блескаш однадвор, а да си празен однатре.

И да, срамота е да купиш скап кабриолет, а да немаш пари да го регистрираш само поради тоа што ќе кажат луѓето за тебе.

Време е да сфатиш дека срамота е да се срамиш од себе. Ништо друго не е срамота!

©CRNOBELO.com Забрането преземање и копирање. Крадењето на авторски текстови е казниво со закон.

С. С. | Црнобело