Денес ми е ден за благодарам – благодарам на трпеливиот сопруг, на ведрата продавачка, на бабата од влез

Денес ми е ден кога сакам да искажам благодарност за сè убаво што ми се случи во текот на денот...

И планирам вака секој ден! Обиди се и ти, ќе ти биде топло на срцето... Не знам, но мене ми е, искрено.

Благодарам на мојот толерантен сопруг што ме трпеше од рано наутро со сите мои реално нереални планови и дури ми даде поддршка дека ќе се обиде да ми помогне.

Благодарам на продавачката која од срце ми се насмевна додека ѝ плаќав на каса, иако ѝ ги собрав сите ситни пари.

Благодарам на возачот со црниот автомобил, кој ми застана на пешачкиот премин, иако јас уште не бев ниту стигната до него.

Благодарам на тетката салатерка која во локалот до моето работно место секогаш со љубов ги прави салатите и тие се вкусни прсти да излижеш.

Благодарам на бабичката што ми ја придржа вратата кога влегував во зграда.

Благодарам на чичкото од соседната зграда кој ми кажа дека зрачам со убава енергија токму во миг кога тоа ми беше потребно.

Благодарам на сестра ми која трпеливо ме слуша и со тешко срце, но сепак ми дава поддршка за моите најлуди авантури.

Благодарам на татко ми што ми простува кога ќе заборавам да му вратам на повикот и тоа ќе го сторам по 3 часа, а тој пак со насмевка ми вели „ало“.

Благодарам на животот што е убав.

И што имаме и сонце и природа и насмевки и уште еден ден живот.

©CRNOBELO.com Забрането преземање и копирање. Крадењето на авторски текстови е казниво со закон.

С. С. | Црнобело / фото: depositphotos.com