Мажите не сакаат лампиони

Без разлика како изгледаат, мажите секогаш се посамоуверени од жените. Жените никогаш не се сигурни дали карминот им е иста нијанса со лакот на ноктите, кој ѓердан да го стават, дали бојата на косата им одговара на тенот и мал милион други ситници. Добро, не велиме дека нема самоуверени жени и секоја чест за нив доколку навистина изгледаат речиси совршено.

Од друга страна, жените се постојано во некаква си тивка војна за да бидат што подопадливи и попровокативни. Во битките употребуваат најразлични оружја, од добро познатиот црвен кармин и високи потпетици па сè до разни силикони, надградби на коса, пластики на ноктите, циркончиња на забите и што уште не!

Една работа која е можеби најпровокативна е самодовербата. Вистински созреаниот маж знае дека убава девојка не значи лице со пакетче пудра, 200 грама пластика, животински влакна, линии и тонови во хаос.

Самодовербата и сјајот во очите е она што ја прави жената женствена. Битен зачин е и насмевката. Велиме ДА за ситна и суптилна провокација, а не маичка која личи на градник. Коко Шанел, најголемата модна икона рекла: „Жената е најблиску до голотијата кога е убаво облечена!“

Се запрашавме што е провокативно за мажите?

Испадна дека и тие не се толку едноставни како што мислевме и дека сечие мислење е во целост различно од некое друго. Додека за некои мажи секси е црната чипка, некои велат дека нема ништо посекси од девојка во дрес од нивниот омилен клуб и памучни килоти.

Не постојат мажи кои што сакаат жени кои наликуваат на лампиони или уште пострашно на накитена новогодишна елка. Излезе дека и длабоките деколтеа и пуш-ап градници ја напуштаат листата на најпосакуваните нешта кај мажите. Еден пријател прокоментира: „Нема ништо посекси од тоа да фантазирам, отколку сè да ми биде сервирано!“

Мажите сакаат жени кои изгледаат природно. За мажите убава глетка е кога таа ќе се разбуди во негова прегратка, ненашминкана, со бушава коса и засипнат глас, а не со размачкана шминка под очите.

Автор: М.К. | Црнобело