Што значат имињата на брендовите H&M, Ray-Ban и Adidas?

Дали некогаш сте се прашувале од каде доаѓаат имињата на познатите светски брендови?

Дел од модните брендови го носат името и презимето на дизајнерите, но за одредени брендови кои се познати низ светот не знаеме зошто така се викаат.

Во продолжение прочитајте што означуваат имињата на H&M, Ray Ban и Adidas:

H&M

Основачот на H&M, Ерлинг Персон, ја отворил првата продавница во 1947 во Шведска под името Hennes, што на шведски значи „нејзино“. Тогаш се продавала само женска облека.

Но, во 1968ма, Hennes го промениле името бидејќи им се придружил и друг бренд, Mauritz Widforss, бренд за риболовна опрема. Во продавницата, освен женска облека, почнала да се продава и облека за мажи и за деца, а името станало Hennes and Mauritz.

Во 1974та, името е скратено на првите букви, H&M, а брендот постои и денес.

Ray-Ban

Модата секојдневно се менува, но Ray-Ban остана вечна класика за која нема алтернатива. Сигурно и вие, а можеби и вашите родители сте носеле пар „рејбанки“ некогаш во животот.

Овој бренд е оформен во 1937 година од американската компанија Bausch & Lomb. Тие го измислиле познатиот авијаторски облик откако еден пилот им побарал да направат очила за заштита од сонце за време на лет во авион. Овој дизајн за кратко станал многу популарен и баран и кај припадниците на армијата и општо кај луѓето.

Моделот комплетно ги одбивал сончевите зраци (на англиски ray ban), па оттаму и дошло името Ray-Ban (одбивач на зраци).

Adidas

Името на познатиот спортски бренд Адидас доаѓа од името на неговиот основач Адолф (Ади) Даслер кој на неговиот прекар Ади ги додал првите три букви од неговото презиме Даслер.

Адолф потекнува од мало германско гратче каде во периодот меѓу двете светски војни заедно со неговиот брат направил успешен бизнис за спортски обувки, Gebruder Dassler. Но, браќата имале многу несогласувања и се разделиле. Адолф продолжил да создава под името Adidas, а неговиот брат Рудолф го основал брендот PUMA.

М. В. | Црнобело