Едноставна техника како да го запомните името на новиот познаник

Името на новата личност во вашиот живот поврзете го со нешто интересно и смешно за вас, без разлика колку тоа би звучело апсурдно за останатите.

Колку пати ви се случило да се најдете во друштво на нова личност, да се запознаете и само неколку минути подоцна да не можете да се сетите на неговото име?

Тој се ракува со вас, ви го кажува јасно и гласно, но вие едноставно ја немате оваа информација во мозокот.

За нареден пат да не се срамите и да се колебате како да му се обратите на новиот познаник потребна ви е техника на помнење.

Во тоа ќе ви помогнат 5 златни правила:

Првата работа што ќе ви падне на ум

Кога барате асоцијација со нечие име не размислувајте премногу, туку изберете го првото нешто што ќе ви падне на ум.

Без разлика дали е со инсект или некое место, конекцијата на името со асоцијацијата ќе функционира одлично ако сте асоцирале со нешто лесно и едноставно.

Вие сте херој на асоцијациите

Асоцијацијата треба да биде поврзана со вас, нешто што ви се случило вам и вам ви е од голем интерес, така полесно ќе запомните.

Ако читате за некоја историска битка и се замислите себеси како херој на истата, тогаш дефинитивно ќе ги запомните фактите поврзани со неа. Па, така името на новиот познаник можете да го поврзете со името на некоја личност што ви е значајна во животот како сестра, партнер, родител или пак со име на личност од историјата што ви е интересна.

Асоцирајте со чувства

Сликите што ги правите во главата кога асоцирате треба да бидат големи, светли со многу детали. Вклучете ги сите чувства за да ја визуализирате сликата најдобро што можете.

Чувствувајте мириси, допири, помнете детали... На тој начин името на новиот познаник нема никогаш да го заборавите.

Размислувајте нелогички и апсурдно

Кој ќе запомните подобро во толпа – девојката во фармерки или девојката со жолт капут? Се разбира, втората.

Вашето внимание го привлекуваат необични работи, па така името на новиот познаник поврзете го со нешто такво. Асоцирајте си со нешто нелогично и апсурдно, но впечатливо за вас.

Асоцијацијата треба да биде забавна

Нашата психа со текот на времето ги потиснува непријатните емоции, а ги зачувува пријатните. Смеата ќе ви ја подобри меморијата, па затоа кога ќе запознаете нова личност замислете нешто забавно со неа. Можеби како се сопнува и паѓа или пак како вози велосипед на едно тркало.

Таа забавна асоцијација секогаш ќе ви биде на ум, нема да ја заборавите оваа личност и наредниот пат кога ќе ја сретнете ќе ве преплават позитивни емоции.

С. С. | Црнобело