Водич за секојдневно задоволство: Како животот да не ви се сведува само на работа и спиење?

Сите имаме денови, недели, па дури и цели месеци кога енергетската батерија „ни е на црвено“, односно силата ни е веќе истрошена.

Во тие моменти користењето на ланскиот одмор нема да ви помогне многу, туку од корист ќе ви бидат малите, но важни секојдневни промени.

Почнете чекор по чекор да го следите овој водич, за следен пат побрзо да си ги наполните батериите:

Малку одложете ги задоволствата

Одложувањето на едно задоволство кое може да почека, може да биде голема мотивација. Работите кои не ги добиваме веднаш, сега, обично ни причинуваат поголемо задоволство.

Направете едноставен експеримент – не посегнувајте по чоколадо сред недела, па почестете се со чоколаден десерт во сабота. Ќе сфатите за што зборуваме.

Уживајте во процесот, но не ја заборавајте целта

Едни ќе ве советуваат дека целта е поважна, други ќе ви кажат дека патешествието до неа е поентата. Вистина е дека важен е балансот.

Константното посакување побрзо да стигнете до крајната цел, може да ви ја намали долгорочната мотивација. Напорното работење без крајна цел пак, повторно може да се чини безначајно.

Затоа, поставете цели кои ќе ги поделите на неколку помали цели и така постојано ќе имате мотивација.

Одморајте нормално, не пред телевизор или смартфон

Без разлика дали се работи за тоа како го пополнувате времето за рекреација или  слободните денови наменети за одмор, важно е да ги искористите правилно. А, тоа не вклучува 8 часа поминати пред телевизор и уште 4 залепени пред смартфонот.

Постојано одржувајте ред

Ред во куќата – ред во главата. Не дозволувајте во текот на неделата во домот да се создаде хаос кој подоцна ќе го средувате во сабота и недела.

Наместо тоа, секој ден средувајте по малку. Половина час за средување на облеката или садовите нема да ви промени многу во дневната рутина, а ќе ви го ослободи викендот.

Славете ги и малите победи

Дури и ако се работи за тоа што ја совладавте мрзата и конечно отидовте во теретана или едноставно го направивте тешкиот телефонски повик кој го одложувате со недели – насмевнете се и кажете си браво.

Секој ден завршувајте по барем едно нешто

Не постои полоша навика од тоа да ги оставате работите недовршени, на половина. Трудете се секој ден комплетно да завршувате барем по една задача.

Престанете да им верувате на фотките по социјалните мрежи

Среќно семејство, совршено среден дом, фантастичен гардеробер со милион опции за облекување, полн фрижидер со состојки и рецепти како да ги готвел Џејми Оливер... а, вие едвај имате време да го земете детето после работа или да тркнете до маркет да испазарувате.

Дозволете им визуелно опуштање на очите со овие прекрасни глетки, но не се ни обидувајте да ги достигнете во реалноста. Само ќе губите енергија и мотивација.

Разговарајте со барем еден пријател во текот на денот

Раскажувањето на тековните дневни проблеми можеби не е најпозитивната и најсреќната работа која може да ја направите, но дефинитивно е од помош.

Затоа, разговарајте со партнер, пријател, родител, па дури и специјалист доколку имате потреба.

М. Д. | Црнобело