Kако карањето со братот/сестрата ве прави подобар човек подоцна во животот?

Ја делевте собата, играчките, облеката, обврските околу домот и сè беше причина за конфликт? Не грижете се, здраво е.

Како и повеќето луѓе, сигурно сте имале кавги со вашиот брат/сестра. Од тоа кој добил подобар третман од родителите, па до позајмување на облека без прашање и издавање на тајни, причините за размена на жестоки зборови се многу.

Сега најверојатно сте возрасни и зрели индивидуи, но дали знаете дека токму таа здрава доза на ривалство помеѓу вас и вашиот брат/сестра ве направиле тоа што сте?

Едно истражување покажа дека токму умерените конфликти меѓу браќата и сестрите се важни за развојот на социјалните вештини.

Истражувањето „Toddlers Up“ во кое во текот на 5 години биле набљудувани 140 деца открило дека колку повеќе се карате со братот/сестрата, колку повеќе тој/таа се обидува да ве потисне, толку подобро ги учите комплексните лекции за комуникацијата и моќта на јазикот.

Колку повеќе се вознемирувате еден со друг, толку повеќе учите да ги регулирате своите емоции и сфаќате како тие влијаат на емоциите на луѓето околу вас.

Се разбира, ривалството не треба да ги премине сите граници и да се претвори во нешто негативно. Ако има насилство, тогаш е сигурно дека и подоцна во животот ќе се појави агресија и незадоволство.

Мразењето еден со друг не е во ред, но умерено карање очигледно не само што не е штетно, туку е и корисно.

С. С. | Црнобело