Како да се преживее губењето на пријателството со оние кои ни биле најблиски?

На некои пријателства, за жал, не им е судено да останат вечни. Распаѓањето на пријателството често може да боли еднакво како и раскинувањето на љубовната врска.

Иако сме мислеле дека засекогаш ќе останеме блиски со оној кој ни бил најдобар пријател, реалноста некогаш е далеку поинаква. Причините за прекинување на пријателство можат да бидат најразлични, од изгубена доверба, па до недоразбирање со фатален крај.

Нашите животи се менуваат, а се менуваме и ние. Некогаш е сосема нормално веќе да немате заеднички интереси со најдобриот пријател и тука патиштата почнуваат да се раздвојуваат.

Но, како да се преживее сето тоа, со што помалку болка?

Прифатете дека тоа е нормално

Пријателствата се како врските, а промените се сосема нормални. Иако ви е тешко, помирете се дека со таа личност можеби ќе останете само на поздравување кога ќе се разминете.

Бидете нежни и фини кон себе

Не се обвинувајте и не се прашувајте каде сте згрешиле. Оставете времето да покаже дали тоа пријателство ќе заслужи нова шанса во иднина. А дотогаш, останете фокусирани на оние кои сè уште ви се пријатели.

Размислувајте како возрасни

Пријателствата ве учат на важни лекции, исто како и другите односи со луѓето. Токму ова изгубено пријателство може во иднина да ви помогне повнимателно да избирате кого пуштате во својот живот. Исто така, ќе бидете и поотворени, но и ќе ги засилите критериумите за склопување нови пријателства.

Вратете се на нормалниот начин на живот

Нормално е да сакате одреден период да се изолирате, особено знаејќи дека возрасните потешко склопуваат пријателство. Но, не заборавајте дека надвор некаде вие имате живот и контакти. Можеби ќе успеете да се зближите со некого и да имате квалитетен меѓусебен однос кој ќе резултира со постабилно пријателство.

Е. Д. | Црнобело