Заеднички живот со момчето: Мир или војна?

Вселување во нов стан со момчето звучи романтично, но тоа може истовремено да биде и почеток на трета светска војна.

Многу двојки кои се финансиски обезбедени често се одлучуваат да живеат заедно пред брак, но за некои од нив тоа било лош чекор и горко искуство.

Размислете на овие работи, пред да почнете со пакување и вселување:

Негов дом, ваш дом, заеднички дом

Кога се вселувате во туѓ дом, треба да запомнете дека пред да дојдете вие тој стан или куќа биле целосно на вашето момче и токму тука настануваат кавгите. Пред да се вселите најдобро е на почеток да пробате тест за вселување од неколку недели додека комплетно не се навикнете на туѓото и заедничкото.

Уште подобро би било на почеток да живеете на независна територија, на пример некаде под кирија ( секако доколку имате можности).

Граници и правила

Зборувајте отворено и обидете се меѓусебно да ги сфатите идеите и размислувањата на другиот околу тоа што за нив значи дом и заедничко живеење. Разговарајте за сите детали околу перењето, пеглањето, миењето садови, готвењето и направете план за рамноправно да ги поделите обврските.

Токму тие ситници се предизвикувачи на најголемите кавги во заедничкиот живот.

Излегувања: Пред и потоа

Само затоа што се гледате секој ден, не значи дека не треба да излегувате. Барем еден ден во неделата правете нешто поинаку и барем еднаш излезете посебно со пријателите.

Иако сте заедно, тоа не гарантира никаква иднина, затоа не се запоставувајте себе и инвестирајте во пријателства и живот надвор од границите на вашата врска.

Иритирачки навики

Ја оставате четката за коса каде ќе стигнете, тој не ве слуша додека му зборувате, облеката ви е повеќе надвор отколку внатре во гардероберот и слични ситни навики кои некого можат да го извадат од кожа. Научете како да се почитувате и стекнете нови навики кои и двајцата ќе ги обожавате.

Иднина

Вселувањето со вашето момче е голем чекор, но што потоа? Брак? Деца? Доколку вашето момче не се гледа подготвено за брак, ниту за деца, а од друга страна пак вие тоа го посакувате тогаш најдобро е да се тргнете од таа врска што побрзо.

Несогласувањата околу иднината не само што ги создаваат кавгите, туку додека се освестите може да помине многу време.