Љубовни освежувања

Љубовта е непресушна инспирација. Секој од нас се труди со свеж и трезен поглед на светот да ги открие јавните, приватните и тајните...

... вистини за љубовта. Порано, или подоцна се јавува нагонска потреба љубовта да се освежи со воведување на разни промени. Некогаш треба да се запрашаме дали е воопшто можно да се сочува љубовта без нечие жртвување, или самоодрекување.

Жените мислат дека тие секогаш жртвуваат повеќе, за другите, не за себе. Мажите го тврдат истото, ако воопшто некој ги праша.

Би требало да се апелира и на мажите и на жените да се откажат од своите жртвувања и страдања во животот. Тоа е непотребен товар за оној што се жртвува, како и за оној за кого претерано се грижи.

Векот во кој живееме од нас бара да ги укинеме жртвувањата кои никој од нас не ги бара, а ние ги повторуваме по инерција од претходните времиња. Сето тоа ги загрозува нашите животи.

Од љубовта кон себе почнуваат сите други видови љубов. Ако не се сакаме доволно себеси, нема да ги сакаме ни другите, ни работата, ни бракот, ни семејството, земјата во која живееме. Напротив, ќе ги мразиме сите и сè што ни е наметнато против нашата воља, како нешто што во нас ќе разбуди длабоко и болно незадоволство.

Ако од своето формирање сме се бореле за љубов, не можеме сега да се бориме против неа. Мораме да се прилагодуваме, без разлика на брзината и на немилосрдниот ритам на третиот милениум.

Како се освежува љубовта?

Дали недостатокот на свежина во љубовта е причина за незадоволство и осаменост во современиот свет? Да бидеме искрени, монотонијата во која се запаѓа во долгите врски е неминовна. Никој тоа не го избегнал.

Сепак, има такви што успеале да и се спротивстават и да ја победат. Би требало да го пронајдеме и нашето име на таа листа.