Впечатливи фустани, светки и уникатни шешири - Модата на изборот за Маж на годината 2023

Црни класични фустани, облека со светки, но и шешири во интересни форми избраа гостите на доделувањето на наградите Маж на годината 2023, кое се одржа вчеравечер (20.12) во хотелот Хилтон во Скопје.

Изборот за Маж на годината беше доволна причина гостите да се дотераат и да го покажат својот стил.

Најмногу внимание привлекоа дамите со шеширите, но и еден маж кој на гала забавата дојде облечен во црвен костум со црвен шешир.

Наградата Маж со најмногу стил ја доби оперскиот пејач Иван Наумовски, кој за гала забавата избра црн костум со дискретни светки, во комбинација со црна кошула и елек.

Подеднакво впечатлив беше и проф. д-р Светозар Антовиќ, кој ја доби главната награда за Маж на годината (заедно со колегите од неговиот тим). Тој на забавата беше облечен во црн костум со детали од кадифе.

Ни дамите не потфрлија во изборот на облеката.

Особено впечатливи беа пејачките Калина Велковска и Полина Тасева, кои двапати настапија пред гостите.

За првиот настап двете пејачки избраа долги фустани, Полина со светки и шлиц до колкот, а Калина со карнери и асиметричен – долг одзади, а напред краток.

За вториот настап носеа кратки фустани, едната во црвена, а другата во црна боја.

Погледнете дел од највпечатливите модни изданија на изборот за Маж на годината 2023 на следната страница...