Dolce&Gabbana направи чанта во форма на сувенир од Фонтаната Треви – би ја носеле ли?

Совршено и прецизно изработена, со релјеф, текстури и форми кои беспрекорно ја доловуваат архитектурата на фонтаната, но и флуидноста на водата – Dolce&Gabbana го претвори симболот на Рим во ремек-дело во форма на чанта.

Еден од најпознатите и најлегендарните симболи на Рим, Фонтаната Треви, е отсликан во најновата колекција на Dolce&Gabbana.

Доменико Долче и Стефано Габана прават Алта Мода колекции веќе 12 години, а оваа година, шоуто се одржа на локација каде знаменитостите и рушевините се претворија во модна писта.

Колекцијата беше инспирирана токму од Рим, а на своите креации, на уникатен начин тие „оживеаја“ голем број скулптури и знаменитости кои се главен симбол на вечниот град.

Па така, најпознатиот симбол на Рим, Фонтаната Треви уште еднаш стана ремек-дело, претставено на долго палто, правено со специјални техники за да изгледа така беспрекорно. 

Но, освен што беше пресликан на палто, овој легендарен симбол беше претворен и во чанта.

Дизајнот на чантата првично изгледа како скулптура и сувенир од Фонтаната Треви, а изработен е совршено, со внимание на секој детаљ.

Визуелно, овој моден додаток е тридимензионална минијатурна верзија на фонтаната Треви, прецизно изработена во релјеф, со текстури и форми кои ја доловуваат флуидноста на водите од фонтаната, како и архитектонските детали.

Делото буквално го отсликува римскиот луксуз и ценењето на висококвалитетната изработка – централни теми на оваа колекција.

Раскош и парче архитектура во дланка – би го носеле ли ова ремек дело?  

М. М. | Црнобело