Во 3 чекори направете модерно макси здолниште

Удобните, лелеави и комотни макси здолништа заради својата практичност се најпосакуваното парче летна гардероба. Затоа што посакувате да имате 10тина вакви здолништа во вашиот гардеробер, не е потребно да трошите многу пари, ниту време. Во само 3 чекори можете да создадете уникатен и удобен модел по ваша желба.

Најпрво, одберете материјал кој најчесто може да го најдете во сите продавници каде што на големо се продаваат различни ткаенини за многу ниска цена. Тој може да биде еднобоен, шарен или пак дезениран со цветови, точки, линии...

Потребен материјал за подготовка на макси здолниште:

• Околу 1,5 метар материјал (задолжително измерете ја должината од струкот до стапалата)
• Околу 80 сантиметри растеглив ластик
• Метро
• Креда или парче сапун
• Шивачка машина
• Ножици
  
  

Постапка:

Ткаенината преклопете ја на половина и измерете ја ширината на вашите колкови. Означете го материјалот во должина и ширина и исечете два, еднакви парчиња од материјалот.

Започнете со шиењето. Внимателно сошијте ги рабовите од двете страни, а кај струкот подвиткајте го материјалот 3-5 сантиметри, зависно од тоа колку широк е ластикот.

Превитканиот раб сошијте го, а потоа полека вметнувајте го ластикот.

Долниот раб на здолништето нема потреба да го порабувате, туку само да го исечете правилно.

Вашето омилено парче облека е готово, за само 20тина минути!

По желба комбинирајте го со дебел колан, надворешен украсен ластик или пак сошијте машна од самиот материјал која ќе биде одличен аксесоар.

Ова се неколку идеи кои може да ви послужат како инспирација.