Фото-приказна: прошетајте низ стариот дел на градот Охрид

Летото сите нè намами да се собереме во Охрид, ако ништо друго барем на два-три дена, чисто да ја разбиеме монотонијата на секојдневието. Работните обврски ги оставивме настрана и бевме подготвени да се нурнеме во водите на Охридското езеро. 

Оваа симбиоза на природното и културното наследство нé прави посебно горди што е дел од нашата татковина.

Иако многумина сакаат денот да го поминат на плажа, пиејќи коктели и уживајќи во електронска музика, мислам дека никој не остана рамнодушен и барем еднаш не ги остави лежерните работи настрана и се реши да ги прошета лавиринтите во стариот дел на градот.

Свесни сме дека градската архитектура во Охрид има посебно место во културното наследство, и токму таму, има голем број на сочувани градби во стилот на ориенталната градска куќа, ѕидана уште во текот на XVIII, XIX и почетокот на XX век.

Со векови наназад, традиционалната македонска архитектура е едно од важните обележја на македонскиот народ, а се смета дека на територијата на Охрид во последните 7.000 години постоел континуиран живот.

Кога ќе ги прошетате тесните улички низ стариот дел од градот, тогаш патот ве води до магијата на Охрид, а тоа е црквата Св. Јован Канео и чистиот поглед што го овозможува овој надреален простор.

Гледано од страна на симболите, како и кај сите народи, така и кај нас, куќата е поимање на космосот. Покривот се поврзува со небесниот свет, подот ја носи сликата на земјата, а ѕидовите ја имаат улогата на четирите страни на светот.

Ова интересно симболичко претставување на куќата се надополнува со уште неколку категории, а тоа е дека собите и пред сé луѓето кои живеат во куќата се всушност душата на самото здание.

Секој зададен чекор во Охрид нè следи со интересни спомени и уште повеќе нè поврзува со трезорот на историјата, минатото и духовното богатство што е дел од сите нас.

Автор: Евгениј Хоуп | Црнобело