Искуството на Евгениј од посетата на селото Куклица и легендата за проколнатите младенци

Се сеќавам дека дедо ми уште на времето ми раскажуваше приказни и легенди што беа поврзани со територијата на Македонија. Едната меѓу нив беше и онаа за проколнатите младенци во селото Куклица, или како што на сите ни е познато местото со камените кукли.

Неодамна, едно неделно попладне заедно со неколку пријатели решивме да го посетиме Куклица, кое се наоѓа на 8 километри северозападно од Кратово и е сместено на десната страна од Крива Река.

За овој локалитет кружат секакви гласини и претставува сведоштво за гневот и болката на несреќната девојка, која го проколнала саканото момче за време на неговата свадба со друга девојка.

Кога пристигнавме немаше други посетители освен нас. Така што имавме можност да се изгубиме помеѓу високите карпи и да се сплотиме со тој вонвременски хронотоп, кој е впишан во колективната мемoрија на овие простори.

Самата помисла и слика што моите очи гледаа ми беше на еден начин загадочна, но истовремено и исполнувачка. Што, ете, после толку години се решив да го посетам овој локалитет во Македонија, кој е познат и како „Весела свадба“, зошто сите гости биле скаменети со насмевки на лицето, а младенците во нежна прегратка.

На заминување, сретнавме еден постар човек, кој пасеше овци. Го поздравивме и само што сакавме да продолжиме, го слушнавме неговото обраќање. Веројатно беше желен за друштво и разговор.

Зборуваше некои дваесеттина минути, ги опфати сите аспекти поврзани со Куклица, дури и ни откри дека неговиот дедо заедно со останите мештани пробале да ја растурат клетвата на вљубената девојка. И секако, не успеале во тоа. Како и сите претходните генерации.

Научниците секако ја оспоруваат легендата, тврдејќи дека камените кукли се појавени врз основа на вертикалната ерозија на вулканските карпи уште пред 10 милиони години. Со тек на годините природата од нив создава ремек-дела што претставува необичен привид и реткост за сите нас.

Без разлика во која верзија ќе веруваме, на крај сите ќе се согласиме дека овој локалит е посебен и ни ја отвора фантазијата за самоволно пополнување на празните. Мислам дека тоа е и најинтересниот дел од самата мистерија поврзана со Куклица.

Автор: Евгениј Хоуп | Црнобело