Со блогерката Софија Јанева на Скопска Црна Гора - во потрага по чист воздух и прекрасна природа

Поради актуелната ситуација со пандемијата, сите поминуваме многу време затворени дома, па затоа топло ви препорачувамe доколку имате можност да излезете на неколку часа во природа, надвор од урбаните места.

Скопска Црна Гора е одлична опција за деновите кога сакате да поминете некој час на чист воздух, а таму ве води блогерката Софија Јанева (@janeva).

Минатиот викенд, спонтано одлучивме да ја посетиме оваа планина и да избегаме од урбаниот метеж.

Снегот и мразот кои нè пречекаа беа неочекувани и тотално изненадување за нас, но сепак си поминавме супер! Малку пешачевме по планинските стази и потоа си направивме мини пикник покрај една мала рекичка.

Скопска Црна Гора е навистина прекрасна и вреди да се посети во овој период затоа што ќе ве пречека со целата своја раскошна убавина – снежни патеки низ густите дрвја, рекички, сонце и чист планински воздух.

Сепак треба да напоменам дека патот до тука е доста тежок, тесен, со свиоци и со многу дупки.

Неколку совети кои ќе ви се најдат за да бидете добро подготвени:

1. Облечете се топло, со ракавици, капа и шал.

2. Зимски гуми/ланци задолжително.

3. Не заборавајте храна и термос со топло чајче или кафе, доколку сакате да седите подолго.

4. Не оставајте ѓубре на планината!

5. Телефонот слободно може да го оставите дома, бидејќи нема мрежа.

Уште една одлична дестинација: Есен на планината Китка - совршенство кое секој треба да го доживее (фото)

Е. П. | Црнобело