Зголемете ја довербата со вашето дете преку игра

Во периодот на предучилишна возраст децата се многу чувствителни и реагираат на најситна лага на своите родители, дури и купувањето на друго чоколадо, а не на ветеното може да предизвика чувство на измаменост кај малото дете.

Во предучилишниот период децата почнуваат подобро да го осознаваат светот, се развива нивната когниција , но и емоционалноста, а родителите посебно тогаш имаат важна улога во насочување на развојот на детето.

Но, како еден родител би влијаел на своето дете доколку нивната меѓусебна доверба е разнишана?

Постојат неколку игриви вежби кои ќе ви помогнат да го подобрите односот со вашето дете.

Водење слепи (се препорачува за деца од 5-7 години или нагоре)

Нa детето му се врзуваат очите со марама и тоа со заврзани очи го води родителот до својата соба, потоа обратно родителот ги врзува очите и го води детето.

Со оваа вежба на детето му праќаме порака дека секогаш сме тука за него, дека може да се чувствува сигурно до нас дури и кога очите ни се врзани.

Пад наназад (за деца од 5 години и нагоре)

Застанете зад детето и кажете му да падне наназад, вие фатете го одзади. Може истата игра да се направи обратно, родителот да паѓа наназад, а детето да го придржува, само треба да се има во предвид тежината на детето.

Со оваа игра детето ја чувствува сигурноста во рацете на својот родител, но и ја зголемува својата самодоверба, бидејќи може да му помогне на родителот.

Од симболички аспект оваа вежба ја изразува поддршката меѓу родителите и децата.

Игра тајна (за деца од 7 години и нагоре)

Секој член на семејството нека напише тајна на ливче и истото нека го превитка. На него треба да го напише и своето име. Секој играч зема ливче со туѓа тајна. Се разговара за тоа, на кој член од семејството би му ја кажале тајната, кого би го заштитиле, а кого би го изневериле.

Се прашува секој член дали смее да ја отвори тајната.

Со оваа вежбовна игра се забележува со кој родител детето е во поблизок однос и на кого тоа повеќе му верува.

Н. Т. | Црнобело