„Виновна сум, цело време чекам да дојде наредната дремка на децата - сакам назад на работа“

Постојано се наметнува идејата дека жените треба да „имаат сè“ - кариера, деца, сопруг и дека тоа значи успех. Но, дали некој се прашува какви битки тие водат во душата? Една мајка проговори за тоа.

Вирџинија Тaп (28) испраќа апел да се намали притисокот врз жените и отворено говори за проблемите што ги имала за да се поврзе со нејзините деца.

Таа на својот блог Bush Bambinos вели дека едвај чекала да се врати на работа затоа што мајчинството било потешко од што некогаш замислувала. Комплексноста на улогата родител комплетно ја збунила. Таа постојано размислувала што се очекува од неа.

Вирџинија објасни дека само сакала да пие кафе на мир и да води рационални разговори со возрасни личности, без детето да вреска во позадина за бојата на неговата шолја.

Таа вели дека сè уште учи како да има желба да биде со нејзините деца.

„Буквално требаше да читам книги за да научам како да си играм и да се поврзам со нив“, вели таа.

Потребно ѝ било да научи да биде присутна во мигот на случувањата со нејзините деца, а не бескрајно да биде растргната на миењето садови, праќањето мејлови и проверувањето на социјалните мрежи.

„Ми беше здодевно со децата затоа што ми беше тешко да се поврзам со нив. Почнав да се загрижувам кога сфатив дека ми е позабавно да правам било што друго, отколку да си играм со нив. Како секогаш да ја чекав наредната дремка или времето за во кревет навечер, посакувајќи да има што помалку часови во денот кога се будни.

Понекогаш дури си го поставував прашањето – Зошто сакав да имам деца кога не сакам да си играм со нив? По само 5 минути играње криенка мене ми стануваше здодевно – искрено како на возрасен човек овие игри ми се малку бесмислени.

По една година борба одлучив да го сторам тоа што го прават поголемиот дел од мајките. Ги запишав децата во градинка и се вратив на работа. На овој начин времето што потоа го минувам со нив е поквалитетно и го ценам повеќе.“

Вирџинија вели дека не е совршена и сè уште се труди да пронајде баланс.

Со својата исповед сака да им даде поддршка на мајките кои не сакаат да ја запостават својата кариера дури и кога децата им се мали.

С. С. | Црнобело