Како да останете свои во хаосот што доаѓа со мајчинството и да не заборавите на себе?

Кога мајките мислат на грижа, ретко мислат на себе. Всушност, според истражувањето на HealthyWomen и Working Mother, 78 проценти од жените рекле дека честопати ја занемаруваат грижата за себе, бидејќи се премногу зафатени грижејќи се за своето семејство.

Факт е дека треба да почнеме да размислуваме за грижата за мајките како составен и суштински дел од грижата за децата. Зошто? Затоа што во целодневниот хаос на менување пелени, пеглање, перење, повторно менување пелени, еден оброк, друг, трет додека не го погодите вистинскиот, потребни ви се само неколку минути оддишка за да се потсетите дека постоите како за бебето, така и за себе.  

Па, како да успеете да се справите со целиот тој хаос и да се посветите на себеси?

Бидете свесни за вашите чувства

Првото нешто што мајките треба да го направат е да ги проверат сопствените потреби. Во услови на хаос во секојдневниот живот, излегувањето од дома изгледа како невозможна мисија, но со поставување трајни практики тие ќе ја разберат директната врска помеѓу грижата за себе и менталното и физичкото здравје.

Пронајдете си хоби

Тоа нè потсетува дека сме повеќе од мајки - всушност, сме мултидимензионални, сложени единки. Хобито може да биде можност да се вклучите во одредена друштвена група, да запознаете нови луѓе, да направите нешто надвор од грижата за децата.

Да се има хоби не е себичен чин - тоа е составен дел од доброто здравје. Мајчинството вклучува многу жртви, но зачувувањето на времето за себе, колку и да е кратко, е од клучно значење за вашето целокупно здравје.

Побарајте помош, помала или поголема

Барањето помош е вештина која бара пракса, и колку почесто го правите тоа, толку полесно ќе ви станува. Почнете со едноставно барање - замолете го детето да ви помогне и да ја намести масата, или кажете му на партнерот да ги здипли алишата; ова се едноставни, но ефикасни начини да зграбите момент за себе.

Мајките треба да научат да се чувствуваат удобно да побараат помош и во врска со проблемите кои се јавуваат со родителството. Тоа не е знак на слабост, а и ќе ви го направи многу полесен животот како родител.

Сакајте се себеси со сите свои грешки

Понекогаш, најрадикалниот чин на грижа за себе е чинот на простување. Постои голем притисок да се биде идеална, безгрешна мајка, онаа која никогаш не доцни и секогаш го кажува вистинското нешто.

Дозволете си да го отфрлите тој стандард бидејќи е тотално нереален и непотребен. Нашите деца не очекуваат од нас да бидеме совршени. Тие само сакаат да сме присутни.

А. Ш. | Црнобело