Зошто разводот по раѓањето на првото дете е толку чест?

Реченица која често може да се слушне е дека раѓањето на дете засекогаш го менува животот на еден пар. Ова е сосема точно. По пристигнувањето на новиот член, динамиката на семејството целосно се менува.

Паровите често не можат да се адаптираат на новите околности, што доведува до прекин на врска или развод. Пристигнувањето на новиот член во семејството ја тестира силата и квалитетот на врската, но во исто време ги нагласува индивидуалните разлики во способноста да се адаптираат на новите промени.

Французите имаат термин „Baby Clash“ кој го дефинира овој проблем како новонастанатата криза или конфликт во партнерските односи.

Терминот се однесува на неспособноста на паровите да се справат со промените и да ги надминат сите кризи и предизвици, што ги наметнува родителството, но истовремено и неможноста да се прифати фактот дека овој однос веќе не е идентичен како пред раѓањето на детето.

Парадоксалниот факт е дека детето не го зајакнува и дополнува односот, кој до тогаш добро функционирал, туку станува причина за неговиот распад. Постојат многу фактори кои доведуваат до тоа.

Родителите се среќни што ќе имаат дете, имаат некои реални или помалку реални слики за тоа како ќе изгледа оваа иднина, но никогаш не можат да знаат однапред како навистина ќе изгледа нивниот живот.

Децата бараат голема посветеност, дисциплина и жртвување. Не се сите емотивно и физички подеднакво способни да се навикнат на овие промени на дневен ритам. Повеќето од дневните активности и енергија се посветени на детето, што резултира со недостаток на одмор.

Ова може да влијае на квалитетот на врската поради хроничен замор, раздразливост, чести расправии, вина и очекување дека другото лице повеќе ќе се ангажира.

Грижата и одговорноста ги менуваат луѓето. Потребно е да се навикнете на новите обврски, но исто така, и на промените кај партнерот. Некои партнери можат да се променат целосно, а некои можат да бидат некомпетентни и неподготвени да се адаптираат на новите промени.

Конфликтите и расправиите, исто така, доаѓаат бидејќи ставовите за воспитувањето на децата не се совпаѓаат.

Родителите имаат честа потреба за одмор од дневната рутина на хранење, капење и успивање на детето. Поради ова често пати им помагаат членовите на поширокото семејство, што исто така може да предизвика конфликти и незадоволство, особено ако истите се мешаат во донесување одлуки во врска со воспитувањето на детето.

Физички и ментално исцрпени родители немаат доволно енергија да се посветат на себеси и нивниот однос. Понекогаш ова доведува до претерани судири и конфликти, а понекогаш и до постепено избегнување на партнерот.

Сексуалните односи стануваат поретки што дополнително го влошува квалитетот на врската.

Постои и депресија која се јавува кај родителите по раѓањето на детето. Истата е почеста кај жените, поради хормоналните промени по бременоста и породувањето, но се јавува и кај мажите, во помал процент.

Ашера | Црнобело