Децата единци не се разгалени и неучтиви - разбивање на митовите

Децата кои растат сами имаат предност бидејќи не го делат родителското внимание. Бидејќи тие не се соочуваат со борба за вниманието од родителите, нивната самодоверба се развива.

Постојат многу предрасуди за децата единци и многумина ги гледаат како разгалени и себични. Но истражувањата покажале дека овие деца се можеби и посреќни бидејќи третина од децата во поголемите семејства се жалат на малтретирање од постарите браќа и сестри.

Психолозите сметаат дека карактерот на детето не зависи од тоа дали пораснало само или со браќа и сестри.

Разбивање на митовите

Најраспространетиот мит за овие деца е дека се разгалени. Но, кога ќе се земе предвид дека разгалените деца доаѓаат и од семејства со повеќе членови, особено со помлади родители, станува јасно дека ова не е точно.

Однесувањето на децата во најголем случај зависи од начинот на којшто се одгледани.

Многу долго се веруваше дека децата единци се помалку комуникативни од другите. Но, овие деца имаат интеракција со други деца во градинка, на училиште, во парк...

Нивната предност е што минуваат повеќе време разговарајќи со родителите и други возрасни личности, што пак има позитивно влијание на нивниот развој.

Истражување спроведено во Велика Британија покажало дека многу деца кои биле жртви на малтретирање од постарите браќа и сестри всушност биле многу несреќни за разлика од децата единци кои се поштедени од овие искуства. Исто така, овие деца учат самите да се забавуваат и да си играат.

Постои верување дека децата единци сакаат да им наредуваат на другите бидејќи се навикнати да бидат во центарот на вниманието.

Но желбата за наредување, исто како и разгаленоста, постои и кај семејствата со повеќе деца.

Единците најчесто сакаат да бидат во друштво на други бидејќи дома немаат брат или сестра. Поради ова, тие вложуваат дополнителен труд да бидат прифатени во друштвото.

Децата бараат онолку колку што им дозволуваат родителите. Односно, важно е како ќе се постават родителите и како ќе го одгледаат детето.

Родителите на две или повеќе деца најдобро забележуваат колкаво е влијанието на карактерот врз детето, како и дека истите методи за одгледување не функционираат кај сите.

Како што напоменавме, најголемата предност на децата единици е тоа што не се борат за вниманието на родителите, па им се развива силна самодоверба и здраво чувство на сопствена вредност.

Спирова С. | Црнобело