До 5 години децата ги третираат како кралеви, после 5 - како робови - Правила на родителите од Тибет

Правилата што ги следат тибетските родители им помагаат да израснат комплетни и независни личности. Па, изгледа дека можеме да научиме многу од овој народ.

Кај Тибетанците најважното е да нема никакво понижување, ниту физичко казнување на децата. Тие сметаат луѓето кои сакаат да удрат дете, го прават тоа бидејќи детето не може да им врати.

Погледнете кои правила ги следат родителите од Тибет и зошто би требало да ги пробате и вие:

Прв период: До 5 години

Во овој период, родителите се однесуваат со детето „како со крал“. Не му забрануваат ништо, не го казнуваат, но доколку направи нешто опасно, тие пробуваат да изгледаат исплашено.

На овој начин, детето ќе сфати дека направило нешто лошо.

На оваа возраст се будат љубопитноста и интересот за животот, а детето сè уште не е способно да сфати покомплексни правила.

Доколку, на пример, детето скрши вазна, тоа не знае дека за таа вазна се потребни пари што некој ги заработил. Па ако му се развикате, само ќе му покажете дека сте посилни од него и ќе предизвикате страв.

Втор период: Од 5 до 10 години

Во овој период, родителите се однесуваат кон детето како кон роб. Му даваат обврски и очекуваат да ги заврши.

Доколку детето не успее да заврши нешто, можат да го казнат, но никако со физичко насилство.

Во овој период активно се развива интелектот на детето. Па, тоа може да сфати дека неговите постапки имаат последици. Истовремено, во овој период родителите се обидуваат да го научат детето на што е можно повеќе работи.

Трет период: Од 10 до 15 години

Кога детето ќе наполни 10 години, родителите почнуваат да го гледаат како еднакво на нив. Бидејќи сепак родителите имаат повеќе искуство од тинејџерите, тие постојано ги советуваат своите деца, но и ги поддржуваат во нивните цели. Им покажуваат што треба да прават и како да се однесуваат преку пример.

Доколку детето направи грешка, родителите ги избегнуваат директните забрани и казни и се обидуваат да му укажат на негативните последици.

Во овој период, кај детето се формираат независноста и сопственото мислење, па тоа почнува да презема одговорност за сè што прави.

Последен период: После 15 години

Кога детето ќе наполни 15 години, работата на родителите е веќе завршена.

Тие му покажуваат почит на своето дете, знаат дека е доцна за какво било друго воспитување и ги гледаат резултатите од досегашната работа.

Што ако не се почитуваат овие правила?

Доколку до петтата година го контролирате и казнувате детето, речиси сигурно ќе ја потиснете неговата креативност, интелектот и интересот за животот. Ќе го научите дека секогаш треба да им се покорува на посилните и дека не смее да се изразува.

Откако ќе наполни 5 години, а вие продолжите да му удоволувате сè на вашето дете, тоа може да стане зависно од вас. Речиси сигурно нема да има желба за напредок и развој.

Доколку сè уште сте премногу заштитнички настроени кон детето и откако ќе наполни 10 години, тоа може да прерасне во несигурна и зависна личност.

Доколку не му покажете почит на детето постаро од 15 години, тоа никогаш нема да ви го прости тоа. На оваа возраст детето веќе се чувствува како самостојна личност и има потреба од вашите почит и поддршка.

Спирова С. | Црнобело