Работи што никој нема да ви ги каже кога планирате второ дете

Ако имате дете, сигурно знаете дека во првите неколку месеци, па и години, ситуацијата е навистина стресна и напорна.

А доколку се одлучите за второ, веројатно мислите дека нештата ќе бидат исти и дека овојпат сте навистина подготвени.

Но, постојат неколку работи што никој нема да ви ги каже кога планирате второ дете:

Само мислите дека знаете што ве чека

Сите знаат дека пристигнувањето на првото дете во семејството е важен настан. Доколку веќе имате едно дете, сигурно сте ги исчитале сите книги што ви дошле при рака, сте ги слушале советите на сите и сте ги следеле сите правила.

А откако ќе го поминете сето ова, веројатно претпоставувате дека знаете што ќе ве чека и вториот пат.

Мислите дека можеби второто дете ќе биде поголемо, погласно и поскапо, но воглавно, нештата ќе бидат исти.

Но, родителите со второ дете неретко се чувствуваат преморено, имаат депресивни епизоди, па дури и средовечни кризи. Проблемот е што ретко го поврзуваат ова со нивното второ дете.

Сепак, изгледа дека грижата за второто дете може да биде многу поголем предизвик.

Помалку време, повеќе притисок

Ова е нешто за коешто ретко се зборува.

Кога ќе го добиете првото дете, можете да му го посветите целото време на светот. Но, кога ќе пристигне и второто, одеднаш треба да се грижите за две мали личности. Ова значи дека имате многу помалку време, но многу повеќе притисок. Покрај тоа, многу родители ќе ви кажат дека најдобро е да заборавите на одморот.

Второто, третото и сите наредни деца не им даваат нова улога на родителите, туку само им ги зголемува досегашните обврски. Како резултат, физичкото и менталното здравје на родителите страда.

Ова е особено изразено кај жени кои се во брак во кој и двајцата партнери сакаат да работат.

Што мислат родителите?

Секој родител со две деца ќе ви каже дека неизмерно ги сака и двете. Но, поголемиот дел од нив ќе кажат дека целото искуство било тешко, а понекогаш страда дури и врската со партнерот.

Речиси сите, и мајките и татковците, сметаат дека не се добри родители и чувствуваат вина бидејќи сметаат дека го запоставуваат првото дете.

Уште полошо е што ретко кога родителите зборуваат за ова, понекогаш бидејќи немаат време, а понекогаш поради чувството на вина.

Нештата се подобруваат

Можеби сето ова звучи страшно, но нештата дефинитивно ќе станат подобри.

Адаптирањето на второто дете може да потрае неколку месеци, а за родителите е важно да се грижат за себе.

Имајте на ум дека со две деца, имате право да се чувствувате изморено и под стрес, бидејќи грижата за децата е и заморна, и стресна.

Како што детето ќе почнува да разбира и да учи нови нешта, ситуацијата ќе стане полесна.

Спирова С. | Црнобело