„Зошто е важно да им раскажувате приказни на децата?“- со логопед Симона В. Николовска

Нема дете кое не пораснало со приказните на мама и тато или на баба и на дедо. Зошто е важно редовно да им раскажувате приказни на вашите најмили - за придобивките ни пишува логопед Симона В. Николовска.

Раскажувањето е најстарата форма на учење и со себе носи многу бенефити по развојот на детето.

Раскажувањето е сложена јазична вештина со која настаните се излагаат по посебен хронолошки редослед, со назначено место, ликови, и последици на настаните.

Ги подобрува јазичните способности

Кога дечињата слушаат приказни, се изложени на презентација на приказната на уникатен начин. Со секое наредно раскажување, детето учи нови зборови и го зголемува својот вокабулар.

Ја зголемува меморијата

Раскажувањето не користи употреба на визуелна дразба и презентација на слики, па така потребно е детето да ги запомни сите ликови и настани и клучни точки. На следното раскажување треба да ја прераскаже приказната со сите елементи на повторно уникатен начин.

Прераскажувањето на друго лице вклучува бројни вештини, како што се:

• Обликување на текстот
• Избор на соодрветни зборови
• Разбирање на причинско – последичните односи, односно разбирање на приказната
• Разбирање на улогата на раскажувачот и слушателот.

Раскажувањето се потпира на јазичните знаења и со него можеме многу да знаеме за јазичниот развој на едно дете.

Истражувањата покажале дека раскажувачките вештини кај децата се тесно поврзани со успехот кој децата го постигнуваат на училиште.

• Читањето го зголемува ентузијазмот кај децата за читање
• Ги подобрува вештините за слушање и внимание
• Го охрабрува пишувањето на свои приказни кај децата.

Важно е да се запомни дека кога им раскажуваме на децата приказни, тие треба да бидат соодветни за нивната возраст.

Користете ја секоја прилика да му раскажувате на Вашето дете приказни, но и да ги освежите сеќавањата и да ги раскажувате минатите настани.

Охрабрете го детето да Ви раскажува, помагајте го раскажувањето на детето, кое секогаш почнува со едноставни реченици, за на возраст од 3-4 години, да развие силни раскажувачки вештини.

Логопедот Симона Василеска Николовска може да ја следите на Инстаграм. Доколку имате прашања и предлози за тема на разговор со логопедот, испратете ги на Оваа е-адреса е заштитена од спамботови. Треба да ви е овозможено JavaScript за да ја видите..

©CRNOBELO.com Забрането преземање и копирање. Крадењето на авторски текстови е казниво со закон.

фото: depositphotos.com