Како сестрите Џенер го чистат лицето со ацетон?

Третманот, благодарение на кој Кендал и Кајли Џенер имаат беспрекорна кожа, ја заинтригира јавноста поради необичната состојка која малкумина би ја ставиле на лице.

Од семејството Кардашијан - Џенер сме навикнати секојдневно да нè изненадуваат. Овојпат, тоа е со бизарниот третман за убавина што го користат сестрите Џенер за нега на лицето. Кендал го обожува, а и Кајли не е имуна на неговата делотворност.

Нималку вообичаен, „slush" е третман за убавина при кој за чистење на лицето се употребува сув лед и ацетон – истиот што се користи за отстранување на лакот од ноктите и чиј интензивен мирис е невозможно да го игнорирате.

Нежниот пилинг се подготвува мошне едноставно, со замотување сув лед во газа која е натопена со ацетон, а најчесто се нанесува на лицето, но одличен е и за кожата на грбот и деколтето.

„Ледениот пилинг“ ја чисти кожата и смирува воспаленијата кои се поврзани со акните. Дерматолозите го препорачуваат и на оние што немаат проблеми со мозолчиња, бидејќи ја отстранува нечистотијата и мрснотијата од кожата, спречувајќи го затворањето на порите. Третманот трае околу 10 минути, безболен е, а пoтребно е да се применува еднаш месечно.

Иако не станува збор за новитет, се најде во центарот на вниманието откако во реалното шоу „Revenge Body" на Клое Кардашијан, дерматологот Кристи Кид презентираше мошне сличен третман на оној што го користат нејзините сестри.

Важно: Не ви препорачуваме да го испробувате третманот сами, дома, без консултација со дерматолог.

М. А. | Црнобело