Оваа пролет пробајте го тројниот розов мејкап стил

Месецот март уште е познат и како месец на модата во кој се дефинираат трендовите, кои ќе ги одбележат следните сезони. По сивилото на зимските месеци, следува будење на природата, а тоа значи дека и во вашиот изглед треба да внесете повеќе боја.

Најновиот тренд за шминка е таканаречениот тројно розов мејкап стил, што значи во исто време да се носи розова сенка за очи, розово руменило и розов кармин.

Ваквата шминка дава природен и здрав изглед на лицето.

За да го постигнете овој изглед најпрво треба да го исчистите лицето темелно, со гел за миење и тоник (производите кои ги користите за секојдневна нега) и потоа да нанесете од вашиот дневен крем за лице и безбоен балсам за усни.

За навечер може да си дозволите и малку потешка пудра. Бирајте ги козметичките производи според вашиот тип на кожа.

За дневен изглед користете само лесна подлога или тониран крем за лице, во зависност од типот на вашата кожа. Употребете сенки со сјајни честички и нанесете рамномерно на капакот.

Може да користите една нијанса, но и да мешате повеќе тонови на розова. Важно е само да не е пренагласено.

Потоа, нанесете руменило во нежна розова. Можете да користите руменило во вид на прав, стик или камено. Најважно е да не претерувате, туку да изгледате како образите да ви се зацрвениле од студ.

За усните, за дневен изглед доволен е и само балсам со розови пигменти или дискретна мат нијанса, додека за вечерен изглед може да си поиграте и со поинтензивен кармин кој ќе одговара на остатокот од изгледот.

Бонус совет: За уште поприроден изглед, наместо црна, употребете кафеава маскара.

С. У. | Црнобело