Зошто треба да ја сушите косата со ладен воздух?

Сушењето на косата е здодевна рутина. Особено ако брзате да излезете, фенот знае да биде вистински „удав“, а ако сте од оние кои секогаш некаде брзаат, сигурно ви се случило да излезете со полумокра коса.

Уште посигурно е дека копчето на фенот за ладен воздух никогаш не сте го употребиле. Но дали некогаш сте се запрашале за што истото тоа служи?

Секако дека топлиот воздух побрзо ќе ви ја заврши работата, но според стилистите, фризерските алатки кои работат на висока температура се наменети за промени на косата односно стилизирање, а тука спаѓа и фенот.

Дополнително, температурата треба да биде приспособена на типот на вашата коса - ако имате дебело влакно и густа коса, температурата треба да биде повисока. Ако имате тенка или оштетена коса, треба да внимавате температурата да биде пониска.

Селебрити стилистите се согласуваат дека топлиот воздух е побрзата алтернатива, но и помалку здравата. Фенирањето со топол воздух може лесно да ја оштети вашата коса, па затоа се препорачува да ја намалите температурата.

Ладниот воздух помага да ја задржите формата на косата што ја посакувате. Тој се користи да се олади косата - кутикулите се „смрзнуваат“ на едно место и добивате мазен и сјаен финиш особено ако користите соодветна четка за коса.

Всушност, ладниот воздух делува како лесен спреј за коса кој и помага на косата да ја задржи својата нова форма.

Толку е едноставно - нема да ја оштетите косата, а како бонус ќе добиете фризура што ќе потрае.

А. Ш. | Црнобело