Зошто парфемите мирисаат различно на секоја кожа и како да го одберете најдобриот за вас?

Можеби сте забележале дека одреден парфем мириса прекрасно на вашата пријателка, но остава сосема поинаков мирис на вас. Дали некогаш сте се запрашале зошто и како се случува тоа?

Одредени типови кожа имаат различни својства кога станува збор за мирисот. Иако не постојат научни студии за тоа зошто одреден мирис различно реагира на секој човек, Мајкл Донован - ескперт за парфеми, има неколку теории засновани на неговото 20-годишно искуство.

„Интересно, забележав дека и кај луѓето со различна боја на коса мирисот е различен. Мој совет? Секогаш проверувајте како мирисот реагира на вашата кожа пред да платите за него.

pН вредноста на кожата варира од личност до личност, што може да го промени мирисот на парфемот“, споделува Донован за веб-сајтот Byrdie.

Дури и вашата исхрана и хормоните можат да влијаат на мирисот. Кога нивото на естроген ќе падне, побрзо се загревате и малку повеќе ќе се потите, што пак ќе влијае на вашиот парфем. 

Луѓето ги привлекуваат мириси кои одговараат на нивниот природен мирис на телото. Ако имате „нормален“ тип кожа (не сува или мрсна), повеќето парфеми ќе мирисаат на вас исто како што мирисаат на тестерите во продавниците.

Но, треба да знаете дека вашата pH вредност, промените на нивото на хормони и исхраната можат да влијаат на аромата во текот на месецот.

Како да го одберете најдобриот парфем за вас ако имате мрсна или сува кожа?

Мрсна кожа

Повеќето парфеми се направени од состојки кои мастите на кожата ги привлекуваат.

„Доколку имате мрсна кожа, горните ноти на парфемот ќе останат подолго, но исто така може да се пренагласат одредени елементи на парфемот.

Според моето искуство, слатките ноти можат да бидат премногу силни на мрсната кожа. Овошните ноти, од друга страна (особено цитрус), можат да бидат неверојатни.

Нотите кои едноставно би исчезнале на сува кожа можат да бидат прекрасни на мрсна кожа“, објаснува Донован.

Скромните и дискретни мириси можат да се трансформираат во нешто прекрасно. Сепак, треба да бидете внимателни бидејќи одредени елементи може да се пренагласат и да го нарушат балансот на парфемот.

Сува кожа

Сувата кожа бара посилни мириси со силна основа за задржување на мирисот.

„Ориенталот и шипресот делуваат добро, како и цветови со посилен мирис, како туберозата. Деликатните мириси ќе испарат, па ви треба нешто посилно“, советува Донован.

Ако сакате парфемот да трае подолго на кожата, нанесете лосион или масло без мирис пред да го испрскате парфемот.

M. Г. | Црнобело / фото: pixabay.com