Дали ноќното потење е знак за сериозен проблем и кога треба да одите на лекар?

Ноќното потење може да биде предизвикано од разни фактори, како менопауза или пиење алкохол. Но, доколку е придружено со други симптоми, добро би било да одите на лекар.

На секој му се случува да се испоти во текот на ноќта.

Ова обично се случува во летниот период, но и во зима доколку спиете во многу топла просторија.

Но, ако се потите секоја вечер, без разлика на температурата во спалната, а притоа потењето е обилно, можеби станува збор за некаков проблем.

Ноќното потење не секогаш е знак за нешто сериозно, но ако ви претставува проблем, препорачливо е да се консултирате со лекар.

Зошто се потиме?

Потењето е како систем за разладување на нашето тело. Како што капките пот испаруваат од телото, температурата на кожата се намалува.

Потта, исто така, се лачи во мали количества на внатрешната страна од дланките, за да го спречи сушењето на кожата и да ни го подобри зафатот со прстите.

Потта се лачи од потните жлезди кои ги имаме низ целото тело, но најмногу на челото, пазувите, дланките и долниот дел на стапалата.

Во најголем дел, потта содржи вода, но одреден процент е и сол.

Потењето е нормално во неколку ситуации, вклучувајќи:

• Високи температури, како во лето
• Физичка активност
• Емоционален стрес
• Јадење лута или многу зачинета храна
• Треска

Што го предизвикува ноќното потење?

Кога станува збор за обилно потење во текот на ноќта, неповрзано со температурата во собата, причина можат да бидат неколку фактори или здравствени проблеми.

Најчестите причини за ноќно потење:

• Менопауза
• Анксиозност
• Лекови – некои видови антидепресиви, стероиди и лекови за болка
• Ниско ниво на шеќер во крвта
• Консумирање алкохол или наркотици

Постојат и некои болести кои предизвикуваат ноќно потење, но во овој случај се појавуваат и други симптоми поврзани со болеста.

Овде спаѓаат болести како:

• Хипертироидизам
• Нарушувања во спиењето, како апнеја
• Туберкулоза
• ХИВ/СИДА
• Хочкинов лимфом
• Леукемија
• Автоимуни болести

Кога да посетите лекар?

Доколку ноќното потење не е пропратено со други симптоми, не треба да бидете загрижени, но сепак е добро да одите на лекар.

Со негова помош ќе ја откриете причината и ќе се ослободите од оваа непријатна појава.

Добро би било да одите на лекар и ако:

• Потењето се случува секоја ноќ
• Имате несоница поради потењето
• Забележувате други симптоми како нагло слабеење, болки, кашлица, дијареја…
• Ако сте жена и ноќното потење почнало неколку месеци откако прекинале симптомите на менопауза

Спирова С. | Црнобело