Едноставна вежба за дишење што го намалува ризикот од Алцхајмерова болест

Ново истражување покажало дека едноставна вежба за дишење можеби го намалува ризикот од Алцхајмерова болест. Според научниците, оваа вежба го намалува нивото на два вида протеини во крвта за кои се верува дека се една од причините за појава на болеста.

Алцхајмеровата болест е најчестиот тип на деменција.

На почетокот се карактеризира со мали проблеми со сеќавањето, кои можат да кулминираат во неспособност за комуникација.

Причината е тоа што болеста ги „напаѓа“ деловите од мозокот кои ги контролираат јазикот и сеќавањето.

Експертите сè уште не се сигурни што точно предизвикува Алцхајмерова болест, а досегашните истражувања покажале дека возраста е еден од факторите – лицата над 65 години се изложени на најголем ризик.

Исто така, се верува дека и генетиката може да има влијание. Но, важно е да се нагласи дека ова не значи дека и вие сигурно ќе имате Алцхајмер ако имате член од семејството со оваа болест.

Истражувањата покажале и дека една од можните причини за појава на Алцхајмер е абнормалното акумулирање на два вида протеини во и околу клетките на мозокот.

Засега не е познато што го предизвикува ова акумулирање, но експертите сметаат дека почнува многу години пред да се појават првите симптоми.

Сега, пак, ново истражување покажало дека некои вежби со дишење можеби го спречуваат овој процес, а со тоа најверојатно го намалуваат ризикот од Алцхајмер.

Во истражувањето објавено на веб-сајтот Nature учествувале 108 испитаници на возраст од 18 до 30, како и на возраст од 55 до 80 години.

Испитаниците биле поделени во две групи и двапати дневно правеле различни вежби со дишење. Истражувањето траело четири недели.

Потоа научниците го проверувале нивото на проблематичните протеини во крвта на испитаниците, споредно со периодот пред истражувањето.

Резултатите покажале дека испитаниците кои правеле една од вежбите имале пониско ниво на овие протеини во крвта.

Како да ја изведете вежбата за дишење што се покажала како ефикасна?

Станува збор за навистина едноставна вежба која може да ви помогне да се ослободите и од стресот.

Треба да ја правите еднаш-двапати дневно, во период од 20 минути.

• Седнете во удобна положба.
• Вдишувајте пет секунди.
• Издишувајте пет секунди.
• Повторувајте 20-тина минути.
• Правете ја вежбата барем четири недели.

Засега експертите не знаат зошто дишењето има влијание врз нивото на двата вида протеини, но сметаат дека изведувањето на вежбата можеби го намалува ризикот од Алцхајмер.

Што можете да направите за превенција на Алцхајмер?

Секако, важно е да се обрне внимание и на животните навики кои го зголемуваат ризикот од болеста.

- Немојте да пушите

- Сведете го пиењето алкохол на минимум

- Хранете се здраво

- Вежбајте барем 150 минути неделно

- Редовно проверувајте го крвниот притисок

- Ако имате дијабетес, држете се до препорачаниот начин на исхрана и примајте ја препишаната терапија

Погледнете и: Често заборавате? 4 работи со кои го зголемувате ризикот од деменција + како се препознава и третира

Спирова С. | Црнобело