Често се изолирате и уште седум знаци дека ќе ви годи разговор со терапевт

Не можете да го контролирате гневот или, пак, само се соочувате со тешка животна одлука и ви треба друга перспектива.

Бидејќи кај нас уште постои стигма за менталното здравје, многу луѓе мислат дека на психолог или психијатар треба да одат само оние со сериозни растројства.

Но, ова не е воопшто точно.

Разговорот со терапевт може да ви биде од помош во многу ситуации, дури и ако не страдате од депресија, анксиозност или какво било ментално нарушување.

Неколку знаци дека можеби е добро да си поразговарате со терапевт:

Чувствувате многу изразен гнев или тага

Гневот и тагата се сосема нормални емоции, но сè додека имате контрола над нив и не ви влијаат врз секојдневието.

Ако не можете да ги контролирате испадите на гнев или забележувате дека најголем од времето сте тажни или плачете, можеби се соочувате со проблем за којшто не сте свесни.

Веќе не уживате во омилените активности

Во ред е да ви се менуваат интересите со текот на времето.

Можеби порано сте сакале видеоигри, но сега повеќе уживате во филмови. Или, порано сте сакале да одите во теретана, но сега повеќе да ви годи прошетката во природа.

Но, ако забележите дека губите интерес за скоро сите активности што ви причинувале задоволство, препорачливо е да разговарате со терапевт.

Избегнувате социјализирање

Повремено на сите ни треба време за себе. Впрочем, дури и корисно е да уживаме во самотијата и нашето друштво.

Сепак, кога ова преминува во изолација, најверојатно постои некаков проблем.

Без разлика дали избегнувате социјализирање поради страв, тага или нешто друго, ова е знак што не треба да го игнорирате.

Забележувате самодеструктивно однесување

Не треба да ве загрижува ако некогаш испиете една пијачка повеќе, потрошите повеќе од планираното и слично.

Но, ако ова ви стане норма и генерално правите работи кои сте свесни дека ви штетат, можеби пробувате да се справите со проблем за којшто не сте свесни дека го имате.

Разговорот со терапевт ќе ви помогне да го откриете.

Почесто имате конфликти со саканите

Не постои врска, без разлика дали семејна, романтична или пријателска, без конфликти.

Во животот нормално е многупати да се скарате со партнерот, со некој колега, со член на семејството…

Од друга страна, зачестените конфликти може да бидат знак за посериозен проблем.

Некогаш овие конфликти можеби и немаа врска со самата личност, туку се поттикнати од потиснати емоции.

Сте доживеале нешто трауматично

Зборот траума не мора да е однесува на сериозно насилство. За вас, траума може да биде лошиот однос на колегите или, пак, смртта на миленикот.

Секој настан што ви создава интензивен стрес за вас е трауматичен.

Па, ако неодамна сте се соочиле со нешто вакво и не можете да се справите, побарајте помош од терапевт.

Сакате подобро да се разберете себеси

За да поразговарате со терапевт, не мора да имате некој конкретен проблем, како оние што ги набројавме.

Во ред е и само да сакате да научите нешто повеќе за себе. Можеби и се соочувате со важна животна одлука и не можете да направите избор.

Можеби сакате да го подобрите начинот на комуникација или некој друг аспект од себе.

Сето ова се добри причини за разговор со терапевт.

Потребна ви е поддршка

Некогаш саканите не можат да ни ја дадат поддршката што ни треба.

Некогаш можеби и сакате поразлична перспектива од онаа што ви ја даваат блиските. Терапевтот може да ви помогне и во овие ситуации.

Спирова С. | Црнобело