ПМС или бременост: Како да ги разликувате симптомите?

Гадење

Кога станува збор за ПМС, не би требало да почувствувате гадење или повраќање.

Од друга страна, утринската мачнина е еден од најчестите симптоми на бременост и може да биде придружена и со повраќање.

Важно е да знаете дека и покрај името, оваа мачнина може да се појави во кој било период од денот.

Желба и аверзија кон одредена храна

Кога сте во ПМС, нормално е да имате поголем апетит и да сакате храна со повеќе сол, масти, јаглехидрати и слично.

Во случај на бременост, се јавуваат истите промени во апетитот, но се многу, многу поизразени.

Притоа, кај бремените жени може да се јави и аверзија кон одредени продукти.

Болки во стомакот

Болките во стомакот се честа појава за време на менструација.

Кај некои девојки и жени, можат да се јават и до 48 часа пред почетокот на менструацијата.

Слични болки се јавуваат и во рана бременост, но се генерално поблаги и повеќето жени ги чувствуваат на најдолниот дел од стомакот или долниот дел од грбот.

Ако имате историја со спонтан абортус или ризична бременост, а сте бремени, не би требало да ги игнорирате овие болки, особено ако ви се чини дека се засилуваат.

Кога да одите на гинеколог?

Најпрво, важно е да знаете дека е нормално понекогаш менструацијата да ви задоцни.

Неретко ова е причинето од фактори како стрес, големи животни промени, некои болести…

Ако се сомневате во бременост, препорачливо е да направите тест барем 21 ден по незаштитениот сексуален однос.

Најдобро е да почекате ден-два откако ќе ви задоцни менструацијата за да добиете поточни резултати.

Ако добиете негативен тест, но менструацијата сепак ви доцни, најдобро е да се консултирате со гинеколог.

Ако добиете позитивен резултат, повторно е најдобро да одите на гинеколог кој ќе може да ви ја потврди бременоста.

Спирова С. | Црнобело