Симптоми кои укажуваат на тромб во ногата (и не треба да ги игнорирате)

Прекумерната тежина, како и долгото седење го зголемуваат ризикот од тромб на ногата. Постојат неколку знаци кои укажуваат на тромбоза и штом ги забележите, препорачливо е веднаш да се консултирате со лекар за да ги избегнете компликациите кои можат да бидат сериозни.

Тромбозата се смета за една од најопасните состојби по човечкиот живот доколку не се третира.

Најчесто се појавува во нозете, а во првата фаза речиси и да не дава никакви симптоми, но кога ќе почне да расте и да се забележува, важно е веднаш да одите на лекар за да не дојде до опасни последици.

Фактори кои го зголемуваат ризикот за појава на тромбоза

Што било што го попречува дотокот на крв може да предизвика појава на тромбоза. Тромбот на ногата обично настанува поради оштетување на крвните садови.

Постојат и некои фактори кои го зголемуваат ризикот од појава на тромб:

• Старост
• Долго седење
• Бременост
• Прекумерна тежина
• Пушење цигари
• Лекови
• Малигни болести
• Повреда и некои болести

Симптоми кои укажуваат дека во вашата нога се создава тромб

Симптомите обично се јавуваат само на едната нога, а ретко се случува ногата да биде бледа и отечена. Згрутчување на крвта во ногата обично се формира во вена во бутот, листот или околу зглобот на глуждот.

Дел од симптомите вклучуваат:

• Отекување на нозете
• Болки во нозете (најчесто додека шетате или стоите)
• Чувство на жежење и црвенило на кожата
• Видливи, проширени вени
• Уморни нозе

Во повеќето случаи, пациентите бараат лекарска помош дури кога згрутчувањето многу ќе се зголеми и ќе стане потешко за лекување. 

Како што состојбата се влошува, отокот се зголемува во областа каде што се формирал тромбот, а делот добива сина боја. 

Ако се занемари, екстремитетот каде што се наоѓа згрутчувањето може целосно да стане црн.

Како што веќе спомнавме, за да ги избегнете опасните последици, веднаш одете на лекар штом забележите и најмал симптом на тромб во ногата.

С. Ш. | Црнобело / фото: freepik.com