Ако имате рак и сте под стрес, болеста се шири и до 4 пати побрзо, според ново истражување

„Стресот е нешто од што не може да се заштитат пациентите кои боледуваат од рак“ – вели водечкиот доктор на тимот истражувачи кои докажале дека стресот го забрзува ширењето на болеста за 2 до 4 пати.

Веќе со години се знае дека стресот има влијание врз ширењето на ракот во телото, а сега научниците конечно имаат потврда за тоа како ова чувство може дополнително да ја влоши состојбата.

Група научници од лабораторијата Cold Spring Harbor во Њујорк успеале да покажат како стресот влијае врз ракот.

Имено, тие докажале дека стресот предизвикува да се креираат „лепливи пајажини“ од бели крвни клетки што се нарекуваат неутрофили, коишто им ја олеснуваат работата на клетките на ракот полесно да ги нападнат ткивата.

Истражувањето било направено врз глувци заболени од рак на дојка, а научниците докажале дека кога глувците се ставени во стресни ситуации, ризикот од брзото проширување на ракот се зголемил за 2 до 4 пати.

Оваа студија докажала дека стресот има огромна улога во ширењето на ракот во телото, но не докажува дали тој е и причинител на болеста.

„Стресот е нешто од што не може да се заштитат пациентите кои боледуваат од рак.

Можете да замислите дека сте добиле дијагноза и не можете да престанете да размислувате за болеста или за парите што ви се потребни, или за семејството.

Затоа многу е важно да сфатите како стресот влијае врз болеста“ – вели д-р Ше Јан Си од тимот истражувачи.

Глувците врз кои биле правени истражувањата биле заболени од рак на дојка и било истражувано колку брзо ќе се прошири на белите дробови. Дел од глувците биле изложувани на стрес, како силна светлина, силни звуци, изгладнување...

Кај овие глувци биле забележани зголемен број метастази, а исто така било забележано дека стресот предизвикал намалување на бројот на имуни клетки. Хормоните што се ослободуваат при стрес исто така придонесуваат за побрзо ширење на болеста.

Па така, во еден миг било забележано дека кај глувците веќе и не постојат имуни клетки, туку само неутрофили кои помагаат да се шири болеста.

Било утврдено и дека стресот може да предизвика совршена средина во ткивата за развој на клетките на ракот, па кај пациентите што се под постојан стрес, постои многу поголем ризик од болеста.

Ова истражување, освен што им дало увид за тоа како се шири ракот, исто така покажало и како би требало да се одвива терапијата во иднина.

Тие забележале дека прво мора да се отстранат неутрофилите со помош на антитела и да се користи лек што ќе го спречи нивното понатамошно формирање, па на тој начин ракот престанува да се шири.

Научниците се сигурни дека се на добар пат да најдат начин да го сопрат ширењето на ракот предизвикан од стрес.

Б. С. Б. | Црнобело