Зошто се чувствувате анксиозно и депресивно во недела и како да си помогнете?

Размислете дали постои конкретен проблем што ви предизвикува анксиозни и депресивни чувства и кога сте во можност, направете го понеделник поопуштен работен ден.

Ако работите од понеделник до петок, а викендот ви е слободен, сигурно барем еднаш сте се почувствувале депресивно и анксиозно во недела.

Недела значи дека викендот е при крај, а со тоа и вашето слободно време и следниот ден ќе морате на работа.

Ако ова чувство е повремено, можете да направите некои промени во секојдневието кои ќе ви бидат од помош.

Но, ако ова се случува секоја недела, без исклучоци, а симптомите на депресија и анксиозност се изразени, можеби е добро да се консултирате и со експерт

Во ваквите ситуации, можно е да постои друг проблем, како депресија, незадоволство од работното место, осаменост, изложеност на многу стрес…

Како да се справите со депресијата и анксиозноста во недела?

Направете саморефлексија

Ако секоја недела се чувствувате депресивно и анксиозно, тогаш ова може да биде знак дека треба да промените нешто.

Запрашајте се дали има нешто конкретно што прави да се чувствувате така – дали самото работно место или можеби некој колега.

Дали има некој друг проблем кој го потиснувате, но сепак ви создава немир?

Променете го начинот на размислување

Пробајте да не ја гледате недела како ден кој го означува крајот на викендот.

Наместо тоа, гледајте ја како ден за можности.

Целиот ден сепак ви е слободен, а ви дава и време да се подготвите за новата седмица.

А, со новата седмица доаѓаат и нови можности.

Генерално, пробајте да си го промените мислењето за овој ден.

Направете подготовки уште во петок

За да не бидете под стрес за време на викендот, особено во недела, подгответе се уште во петок.

Одберете што ќе носите на работа, довршете ги запоставени обврски, направете план за следната недела…

На овој начин, нема да паничите кога ќе наближи понеделник бидејќи ќе се чувствувате поподготвено.

Направете план за во недела

Размислете во кој период од денот најчесто ви се јавуваат лошите чувства и мисли, па за тогаш испланирајте нешто забавно.

Немојте така да седите дома бидејќи негативните мисли сигурно ќе ве надвладеат.

Пополнете си го времето со читање, шетање, филм, видеоигра… Што било што ви причинува задоволство и што ќе помогне да се релаксирате.

Создадете рутина

Кај некои луѓе, анксиозноста се јавува бидејќи немаат рутина.

Ако и вам ви треба рутина, тогаш воспоставете ја и за во недела, не само за работните денови.

Направете си листа со задачи, но повеќето нека се фокусираат на грижата за себе, како топла купка.

Не се изолирајте

Некогаш и осаменоста може да биде причина за чувство на анксиозност и депресија.

Дружбата со некој пријател сигурно ќе ви помогне да си ги оттргнете мислите.

Не се форсирајте во понеделник

Неретко, луѓето се под стрес во недела бидејќи знаат дека ги очекува напорен понеделник.

Па, секогаш кога можете, направете го понеделник поопуштен ден на работа.

Спирова С. | Црнобело