Промена во големината на градите и уште 3 симптоми на менопауза за кои ретко се зборува

Поради намаленото ниво на естроген, некои жени забележуваат дека во менопауза им се менува големината на градите. За кои други симптоми е добро да знаете?

Менопаузата е природна појава која го означува крајот на плодните години на жените.

Менопаузата значи и прекин на менсутралниот циклус, и во просек жените ја искусуваат по 50-тиот роденден.

Но, секоја жена е различна и кај некои менопаузата може да почне подоцна, а кај некои порано.

Сепак, без разлика што ова е промена што ја очекува секоја жена, уште постојат симптоми за кои ретко се зборува.

Четири од нив во продолжение:

Промена во големината на градите

Според истражувањата, една од пет жени се соочува со промена во големината на градите откако ќе настапи менопауза.

Повеќето од нив забележуваат дека градите малку им се зголемуваат.

„Ткивото на градите е многу густо. Со возрастa, поради недостатокот од естроген, голем дел од ова ткиво се заменува со масно ткиво.

Пa, жените може да забележат зголемување на обемот на градите“, открива Стивен Голдстејн, гинеколог и професор на New York University.

Но, кај некои жени, поради недостатокот од естроген може да се јави и намалување на обемот на градите.

Ова е бидејќи млечните жлезди се намалуваат, и со тоа се намалува обемот.

Болки во телото

Според гинекологот Сузан Леб Стилин од Њујорк, дури 50% од жените во менопауза се соочуваат со болки, особено во зглобовите.

Овој симптом може да се јави уште во перименопауза, а постепено да исчезне кога ќе настапи менопауза.

Експертите уште пробуваат да утврдат која е причината за овој симптом, но има претпоставка дека и овој пат вината лежи во намаленото ниво на естроген.

Покрај улогата во репродуктивниот систем, овој хормон има влијание и врз зглобовите, мускулите, лигаментите…

Проблеми со празнење на мочниот меур

Кога настапува менопауза, се случуваат многу промени на вагината, а некогаш и на околните органи.

Поради ова, некои жени забележуваат зголемена потреба за уринирање, но и таканареченото подмочување, односно неволно спуштање урина при смеење, кашлање или вежбање.

И за ова се верува дека е причинето од ниското ниво на естроген поради што ослабуваат карличните мускули кои му ја даваат поддршката на мочниот меур.

Зачестени уринарни инфекции

Менопаузата може да го зголеми ризикот од уринарни инфекции.

Веројатно претпоставувате дека и во овој случај причината е намаленото ниво на естроген.

Со ова ослабува одбранбениот систем на уринарниот систем и тој станува посклон на инфекции.

Спирова С. | Црнобело