Ниско ниво на енергија, намален интерес за работа: Рани знаци за Алцхајмер кои не треба да се игнорираат

Алцхајмеровата болест има три фази, а во првата симптомите се поблаги и не влијаат врз секојдневието. Но, добро е да бидете свесни за нив и да се консултирате со лекар доколку ги забележите.

Алцхајмеровата болест е заоблување на мозокот кое има влијание врз сеќавањето, размислувањето, расудувањето и способноста за организација.

Како што болеста напреднува, може да го оневозможи извршувањето и на најосновните обврски во текот на денот.

Алцхајмеровата болест е најчестата форма на деменција и се развива во неколку фази, во период од неколку години.

Губењето на сеќавањето е еден од најистакнатите симптоми.

Кои се симптомите во секоја фаза од болеста и како да се препознае рано?

Благи симптоми на Алцхајмер

Првата фаза од Алцхајмеровата болест обично трае од две до четири години.

Во овој период се јавуваат следниве симптоми:

• Намалено ниво на енергија
• Намален интерес за работа и социјални активности
• Губење на нови сеќавања, како разговор кој само што се случил
• Проблеми со говорот, како искажување на мислите или разбирање на туѓите зборови
• Мали проблеми со координација, како тешкотии при пишување
• Променливо расположение
• Проблеми при возење, како губење на позната локација

Важно е да се напомне дека овие симптоми не мора да се знак за Алцхајмерова болест.

Постојат и други состојби кои предизвикаат слични симптоми, како проблеми со тироидната жлезда, зависност од дрога или алкохол, комбинирање лекови кои не треба да се комбинираат, Паркинсонова болест, интензивен стрес и депресија.

Ако ги забележувате овие симптоми, важно е да се консултирате со лекар бидејќи само тој може да утврди дали е во прашање Алцхајмер или некој друг проблем.

Поизразени симптоми на Алцхајмер

Во таканаречената втора фаза, симптомите почнуват да се влошуваат и да имаат поголемо влијание врз секојдневието. Оваа фаза може да трае од две до десет години.

Во втората фаза, може да почнат да се забораваат поважни случувања од животот, како местото на кое личноста одела во училиште. Може да се случи и личноста да не препознава членови на семејството и пријатели.

Во оваа фаза, личноста може да стане свесна дека губи контрола над својот живот, што придонесува за чувства на депресија и гнев.

Други симптоми кои може да се јават се:

• Отежнат и нејасен говор
• Отежнато планирање и решавање проблеми
• Збунетост за времето и местото на коешто се наоѓа личноста
• Облекување погрешна облека – на пример зимска јакна во лето
• Раздразливост, па дури и гневни испади кон блиските
• Проблеми со спиењето
• Заблуди, како верување дека некој член од семејството пробува да ѝ наштети на личноста

Сериозни симптоми на Алцхајмер

Третата фаза, нарекувана и доцна фаза, е кога симптомите се најизразени и обично трае од една до три години.

Кај лицата со доцен Алцхајмер, може да се јават некои или сите од следниве симптоми:

• Целосна збунетост за минатото и сегашноста
• Проблеми во изразувањето и процесирањето информации
• Отежнато голтање и намалена контрола над мочниот меур и празнењето на цревата
• Слабеење, инфекции на кожата, но и други заболувања
• Екстремно променливо расположение
• Халуцинации
• Намалена способност за движење

Доцната фаза има влијание и врз физичкото здравје, па лицата се поподложни на болести, скршеници, пневмонија, проблеми со забите…

Постои ли лек за Алцхајмерова болест?

За жал, уште не постои лек за болеста и единствено треба да се третираат симптомите и да им се овозможи што е можно поудобен живот на заболените.

Кај повеќето луѓе, симптомите се јавуваат по 65-тата возраст.

Откако болеста ќе се дијагностицира, во просек, заболените живеат од осум до десет години. Но, има ситуации и кога луѓе со Алцхајмер живеат по 15-20 години.

Доколку болеста се дијагностицира на 80 или 90-годишна возраст, тогаш прогнозите за живот се уште помали.

Спирова С. | Црнобело