Со диета против настинката

Настинката и грипот кои се последица од вирусна инфекција, ги напаѓаат и младите и старите во студените зимски денови.

Најчестите симптоми кои ги следат овие заболувања е покачената температура, кашлица, главоболка и малаксаност, а можете да ги спречите или побргу да ги излечите со соодветен начин на исхрана.

Нутриционистите советуваат да земате што е можно повеќе намирници богати со Витамин Ц, А и Е.

Од сите овошја, најмногу витамин Ц, има калинката, а го има и во кивито, портокалот, лимонот и мандарините.

Вареното вино е лек

Одличен извор на витамин А се морковот и тиквата, а со витамин Е изобилуваат оревите, лешниците и бадемите. Треба да се има во предвид дека витаминот Ц оксидира при допир со метален нож, па овошјето не треба премногу да се сечка. Исто така на температура над 35 степени витаминот Ц ги губи своите својства, па лимонот никогаш не го ставајте во жежок чај.

Добар лек против настинка е и вареното црвено вино, но само една чаша дневно. Ова вино е богато со полифеноли кои имаат антивирусни својства, а ги убиваат и бактериите, а кога го варите, додајте малку и каранфилче – ќе биде повкусно.

Разликувајте го грипот од настинката

Избегнувајте млеко

Вирусите не го сакаат минералот цинк бидејќи ги убива и го спречува воспалувањето, па затоа би требало да јадете колку што можете повеќе намирници кои што го содржат овој минерал. Студиите покажале дека повеќе од 33 проценти од светската популација страда од недостаток на цинк, а препорачана дневна доза за возрасни е 15 милиграми.

Природни извори на цинк се пивскиот квасец, семките од тиква, грашокот, брокулата и зелката. Исто така можете да земете шумлива таблета богата со цинк и да ја растворите во малку вода, па со тој раствор да ја плакнете усната шуплина и грлото на секои два часа.

За време на настинката избегнувајте млеко и млечни производи бидејќи го поттикнуваат создавањето на слуз, која го отежнува дишењето. Ако баш не можете без млеко, пијте јогурт со пробиотски бактерии. На листата од непожелни намирници за време на грипот се и слатките и шеќерот бидејќи ја зголемуваат температурата, а ако баш морате да се засладите, земете едно лажиче мед или јачменов слад.

Намирници кои ги убиваат бактериите

Лук

Во Русија е познат како руски пеницилин, бидејќи благодарение на состојката алицин, ги убива вирусите. Најдобро е да се користи во свежа состојба, а ако не можете да го поднесете неговиот вкус, сварете го со некој друг зеленчук.

Пилешка супа

Пилешкото месо ја содржи аминокиселината цистеин, која се ослободува при варењето и го олеснува дишењето. Исто така, поедини лекари тврдат дека пареата која ја вдишуваме додека јадеме топла супа е поефикасна и од инхалацијата, а лековитоста на пилешката супа може да се зголеми ако и додадете малку лук и неколку зрна црн пипер.

Ѓумбир

Овој зачин го сопира кашлањето и допринесува побргу да се отстрани слузта од грлото и белите дробови, па подгответе си сами дома сируп против настинка. Во два децилитри вода ставете две лажичиња свежо исечкан ѓумбир и варете го на тивок оган околу 30 минути. Во тоа додајте две лажици мед и варете уште неколку минути. Дневно земајте по една лажица сируп.