Прва помош при воспалување на грлото

Болката во грлото при голтање, покачената температура, главоболката и болките во зглобовите и мускулите укажуваат на ангина или тонзилитис, едно од најраширените зимски заболувања.

Најчесто се работи за воспалување предизвикано со стрептокока кое го зафаќа ждрелото, крајниците и лимфните жлезди на вратот. Болеста бара лекување, а терапијата се одредува по земањето на брис од грлото.

Меѓутоа, постојат и природни рецепти со кои можете да ги ублажите почетните симптоми и болките во грлото.

Пробајте го и ова: Четири лажици жалфија, сварете ги во две чаши вода, оставете да постои половина час, процедете и исперете го грлото повеќе пати во текот на денот.

Топли облоги околу вратот – Мека ткаенина натопете со оцет и вода, ракија или разблажен алкохол, ставете ја околу вратот и преку неа замотајте подебела марама или шал. Облогот држете го најмалку два часа.

Моќниот лимон – Во почетниот стадиум на ангината ефикасни се средства на база на лимон. Народните лекари советуваат дека во устата, што поблиски до крајниците, да се држат две парчиња лимон исчистени од корката и лесно да се шмукаат. Кога ќе омекне лимонот, можете да го голтнете, а истата постапка повторете ја по половина час.

Средства за плакнење на грлото – Во чаша со свежо исцедено цвекло, ставете кафено лажиче издробен лук, па прелијте го со чаша сварена и изладена вода. Оставете да постои пет до шест часа, но мешајте на секој половина час, потоа исцедете го и плакнете го грлото неколку пати на ден.