Избегнувајте ги овие намирници ако сакате убави заби

Постојат намирници кои секојдневно ги консумираме а кои многу штетно влијаат врз здравјето на забите.

Доколку сакате што подолго да ја задржите убавата насмевка, обидете се да не внесувате премногу леб, алкохол и газирани сокови а не би било лошо да го избегнувате и мразот, сувото овошје и бонбоните.

Скробот се претвора во шеќер

Кога ќе почнете да го џвакате лебот, ензимите во плунката веднаш почнуваат скробот да го претвораат во шеќер. Слична е ситуацијата и со тестенините. Освен тоа, и парченца грицки како чипс или переци може да останат заглавени меѓу забите и така да предизвикаат појава на бактерии во усната празнина.

Избегнувајте да имате сува уста

Пијалоците кои содржат алкохол го намалуваат создавањето на плунката која ги чисти забите од остатоци на храна и штетни киселини и на тој начин се надразнуваат непцата. Исто така, сувата уста го зголемува ризикот од настанување на болести. Правилниот проток на плунката го активира процесот на варење, ги пере остатоците од храна, ги отстранува бактериите и штити од иритации и инфекции на меките ткива. Пијалаците кои содржат кофеин, како чај, кафе и енергетски пијалоци исто така може да ја исушат устата.

Намалете со газирани пијалоци

На забите живеат бактерии кои се хранат со шеќер а газираните пијалоци се преполни со шеќер. Освен шеќер, газираните пијалоци содржат фосфорна и лимонска киселина која ја омекнува глеѓта, го поттикнува пропаѓањето на забите и го зголемува ризикот од кариес.