Зошто сè уште е табу да се зборува за половото здравје?

Иако сме веќе сериозно навлезени во 21-от век, во многу случаи е „срамота“ отворено да се зборува за половото здравје.

Без разлика што сме сè пообразовани и поеманципирани, никако да се искорени навиката да ве прашуваат „А да не има нешто ново?“ кога ќе кажете дека треба да одите на гинеколошки преглед.

Во другите ситуации, се зборува со потшепнување, со шифри и со осудување, па така многу девојки и момци молчат кога е во прашање нивното сексуално и полово здравје.

Срам

Самото спомнување на преглед кај гинеколог или уролог на некој начин е засенето од текот на самиот преглед, наместо да се прифати дека тоа е сосема нормално и првенствено е грижа за сопственото здравје.

Исто така, овој срам се манифестира и поради прострелните погледи на останатите купувачи кога купувате презервативи или тампони. Зошто во 2018-та би бил проблем отворениот разговор за овие нешта?

Себичност

Себичноста и срамот одат „рака под рака“. Сосема е неодговорно да имате секс без заштита само затоа што така ви е поубаво или пак, доколку дојде до полова инфекција, да го обвинувате партнерот поради тоа и да одбивате да се лечите.

Слично е и кога парот се соочува со неплодност, бидејќи дури и во денешно време постојат луѓе кои веруваат дека проблемот е кај другиот и одбиваат да се прегледаат себе.

Контрацепција

Доколку сакате да се заштитите од полово преносливи зарази и несакана бременост, нема компромиси - мора да користите презерватив. Ако партнерот го одбива тоа, подобро е воопшто да немате односи, отколку да се изложувате себе на ризик.

Вистина е дека не постои 100% заштита, бидејќи некои зарази се пренесуваат и од кожа на кожа, но секогаш е подобро да го користиме она што нуди над 98% заштита, а тоа се кондомите.

Отворени разговори

Секако, никој не бара од вас комплетен елаборат за вашата здравствена состојба. Сепак, доколку дојде до разговор на таа тема, подобро е да разговарате отворено.

Тоа не е знак на непристојност и раскалашеност, туку дека всушност се грижите за своето полово здравје, за разлика од оние кои игнорантски се однесуваат по ова прашање.

Е. Д. | Црнобело