Почесто се јавуваат кај „градските“ деца и уште 4 факти за алергиите

Знаевте ли дека мајчиното млеко најверојатно ги штити доенчињата од алергии или дека алергијата на храна може да се јави и подоцна во животот?

Алергиите настануваат кога некоја личност има реакција на супстанци кои се безопасни за другите луѓе. Овие супстанци се познати како алергени и вклучуваат прашина, полен, животни, па дури и храна.

Во продолжение неколку факти за алергиите што можеби не сте ги знаеле:

Алергијата на храна почесто се јавува кај „градските“ деца

Децата кои растат во град почесто патат од алергија на некој вид храна отколку нивни врсници од руралните средини.

Едно истражување покажало дека алергијата на храна е присутна кај 9,8% од децата кои живеат во град, додека во руралните средини кај 6,2% од децата.

Кај децата од градовите е воочен дупло поголем ризик за алергии на кикиритки и морска храна. 

Алергијата на кикиритки можеби се развива уште во утробата на мајката

Следната информација ќе ги заинтересира не само сегашните, туку и идните мајки.

Некои истражувања укажувааат на зголемена веројатност од појава на алергија на кикиритки, доколку жените во текот на бременоста го консумираат овој јаткаст плод.

Но, други истражувања го побиваат ова. Сепак, експертите веруваат дека алергијата на кикиритки најверојатно се развива во утробата на мајката, но не се сигурни за причината.

Алергија на овошје и зеленчук - нова епидемија?

Истражувањата покажуваат дека алергиите на овошје и зеленчук се сè почести, а особено кај децата.

До пред неколку години, „дежурен виновник“ за алергиските реакции предизвикани од храна биле кикиритките, но во последните неколку години тоа место го заземаат овошјето и зеленчукот. 

Мајчиното млеко можеби ги штити децата од алергии

Истражувње покажало дека мајчиното млеко можеби ги штити бебињата од алергии.

Алергијата нa храна, астмата и проблемите со кожата се јавуваат кај околу една третина од децата поради недоволно активирање на имунитетот.

Според експертите, бебињата кои биле доени повеќе од три месеци од раѓањето, имаат помал ризик од појава на вакви проблеми.

Појавата на алергија на храна не е резервирана само за детството

Алергијата на храна најчесто се појавува во детството, но таа се појавува и во позрелите години.

Возрасните најчесто се алергични на морски плодови, но честопати се јавува и алергија на јаткасти плодови.

М. П. | Црнобело