Стресот може да го намали мозокот - Како да ја спречите оваа појава?

Изгледа дека стресот нанесува многу поголема штета отколку што мислевме.

Стресот може буквално да ве направи послаби, а после подолг период, може да го намали и вашиот мозок.

Но, научниците имаат доби вести – можете да го спречите ова.

Стресот е пријател и непријател

Стресот всушност и не е толку лош. На пример, кога ви треба поголем фокус и повеќе енергија, кога учествувате на натпревар или кога држите јавен говор, токму стресот може да ве подготви.

Но, кога постојано сте изложени на стрес, без разлика дали од работното место или конфликт со некоја сакана личност, во мозокот можат да настанат лоши промени.

Постојаната изложеност на стрес може да резултира со главоболки, проблеми со стомакот, висок крвен притисок, болка во градите и несоница.

Премногу стрес го намалува мозокот

Истражување од 2018-та година покажало дека оние кои се постојано изложени на стрес имале послаби резултати на тестовите за меморија. Истовремено, нивниот мозок бил помал за разлика од луѓето кои не се под стрес.

Ова намалување на мозокот има влијание врз деловите одговорни за меморијата и учењето. Па, колку е поинтензивен стресот, толку е поголема веројатноста да имате проблеми со сеќавањето и учењето нови нешта.

Овие ефекти можат да го зголемат и ризикот од деменција. Покрај тоа, можат да се појават и сериозни ментални нарушувања, како депресија.

Можете да го контролирате стресот

За среќа, имате моќ да го држите стресот под контрола и да ги намалите штетните влијанија од него.

Движете се

Редовното вежбање може да ја подобри меморијата и да го заштити мозокот додека стареете.

Со вежбањето го поттикнувате лачењето на ендорфини – хормони кои прават да се чувствувате добро.

Спијте

Телото закрепнува додека спиете, па спиењето е одличен начин да ги намалите штетните ефекти од стресот.

Доколку, пак, не спиете доволно, можете дополнително да го зголемите нивото на стрес.

Внимавајте што јадете

Правилната исхрана има влијание врз расположението, а може дури и да го намали стресот.

Јадете неколку помали порции во денот, консумирајте овошје и зеленчук и ограничете го внесот на кофеин.

Опкружете се со сакани личности

Поддршката е клучна во борбата против стресот. Социјализирањето со пријателите и семејството го поттикнува лачењето на хормонот окситоцин, кој може значително да ја намали анксиозноста.

Направете пауза

Вежбајте јога, медитирајте, одете на масажа, релаксирајте се и одвојте време само за себе.

Кратката пауза од секојдневните грижи и обврски дефинитивно ќе ве смири и ќе го намали стресот.

Некои велат дека стресот не е виновен

Некои научници сметаат дека иако има поврзаност помеѓу стресот и намалувањето на мозокот, самиот стрес не е виновен за оваа појава.

Проблемот е што во истражувањето, се мерело нивото на кортизол во мозокот. Ова е хормон што се лачи кога сте под стрес. Но, кортизолот може да се лачи и поради воспаленија во организмот.

Па, нивото на кортизол што се мерело во истражувањето можеби не било предизвикано од стрес.

Спирова С. | Црнобело