Детоксикација со сокови

Чувствувате пролетен умор, кожата ви е без сјај, надуени сте од алергии, јазикот ви е бел, а мирисот на потта прејак... Тоа се само некои знаци...

...кои нè предупредуваат дека организмот ни е презаситен со токсини. Токму сега е вистинското време за пролетно чистење на организмот.

Со текот на времето, особено во зима, организмот се заситува со конзерванси од храната, газираните пијалоци, алкохолот, цигарите, загадениот воздух. Настапува застој во циркулацијата, што ја отежнува детоксикацијата, па треба да се растерети кожата, бубрезите, црниот дроб, цревата и лимфниот систем.

Со исхраната најважно е да се воспостави кисело базна рамнотежа со консумирање на зеленчук, овошје и пробиотици. Тие содржат минерали како што се: калциум, калиум, магнезиум, цинк.

Наспроти нив се „киселите“ продукти, кои во постапката за детоксикација треба да се избегнуваат, а тоа се месото и преработките од месо, белото брашно и сите производи од него, па дури и двопекот.

Познатата терапија со сокови е ригорозна. Може да се спроведува една недела, а најдолго три недели. Се пијат само сокови од зеленчук и овошје, секако, оние што немаат конзерванси и шеќер. Најдобри се од свежо овошје и тоа веднаш да се конзумираат.

Дневно се пијат 250 милилитри до половина литар сок од зеленчук, а помеѓу тоа се пие овошен сок. Минималното време помеѓу конзумирањето сокови треба да биде половина час. Се пие чај за чистење на крвта и изворска вода.

Кога се чувствува глад, може да се јаде само бистра исцедена супа од зеленчук. Пред спиење, со доста течност се зема лен за поттикнување на варењето.