Пет грешки во реновирањето на бањата за кои луѓето најчесто жалат

Ја отстранувате кадата иако имате доволно простор за неа и „штедите“ на шкафчиња за складирање.

Реновирањето на бањата е голем подвиг што не се прави така често.

Поради ова, важно е максимално да ги избегнете грешките не само поради естетика, туку и поради функционалност.

Кои се грешките за кои луѓето најмногу зажалуваат?

Не ставате полица во туш-кабината (или покрај кадата)

Ако планирате да ставите туш-кабина, никако не заборавајте да ставите и полица.

Ова е детаљ што луѓето неретко го превидуваат, па кога се тушираат мораат да ги оставаат шампоните и другите продукти на подот во туш кабината.

Дури и ако планирате да ги чувате продуктите за туширање на друго место, важно е да имате полица во близина за да си го олесните туширањето.

Ставате плочки со смела боја или дезен

Во бањата најдобро е да се држите до понеутрални нијанси, барем кога се во прашање плочките.

Точно е дека на Инстаграм и Pinterest смелите бои и дезени изгледаат навистина добро, но ова се главно минливи трендови.

Покрај тоа, ако сакате да реновирате во блиска иднина, ќе бидете многу ограничени со избор на елементи ако не сте подготвени целосно да ги отстранувате плочките.

Ја отстранувате кадата

Ако имате када во бањата и не ви треба дополнителен простор, експертите препорачуваат да не ја отстранувате.

Ако имате мали деца, но и куче, кадата ќе ви биде од огромна корист. Покрај тоа, ќе можете да си правите и купки.

Исто така, ако во иднина сакате да го продавате станот (или куќата) кадата може да го направи многу попривлечен.

Не ставате доволно простор за складирање

Важно е како ќе изгледа бањата, но уште поважно е да имате доволно место за сите предмети.

Пред да се одлучите за крајниот дизајн, добро размислете што сè ќе чувате во бањата и колку шкафчиња и полици ќе ви требаат.

Продукти за хигиена, за убавина, тоалетна хартија, продукти за перење облека, корпа за валкана облека – сето ова се работи што ќе треба да ги сместите во бањата.

Не размислувате за греењето во бањата

Ако немате централно греење или бањата не е поврзана со системот, мора да размислите и како ќе ја загревате.

Ако имате мала и добро изолирана бања, можете да ставите и подно греење. За поголем простор, поисплатливо може да биде да ставите радијатор.

Во овој случај најдобро е да се консултирате со експерт кој врз основа на вашата бања ќе ви каже што е најекономично и најефикасно.

Спирова С. | Црнобело