5 брзи идеи што да им подготвите нa децата за ужинка за во училиште

Ролнички со нутела и банана, полнет ѓеврек или макарони... Што можете да им подготвите на дечињата за ужинка?

„Што да спакувам во кутијата за ужинка?“ Ова е проблем со којшто се соочуваат голем број родители чиишто деца ја започнаа новата учебна година.

Доколку и вие од различни причини сте присилени да им подготвувате ужинка на децата за во училиште, во прилог ви даваме неколку предлози за брзи ужинки што ќе им се допаднат и на најпребиливите дечиња.

Ролнички со Нутела

Доколку вашето дете обожава да јаде блага ужинка, тогаш овој специјалитет ќе му биде меѓу омилените.

Затоплете една тортиља и премачкајте ја со нутела, па во средината ставете една излупена банана. Исечете ја тортиљата на мали крукчиња и ќе добиете идеално суши со нутела.

Додадете и ситно исечкано овошје и шишенце со вода и оброкот за вашето дете е подготвен.

Ролнички со шунка и кашкавал

Уште една брза ужинка со тортиљи, наменета за дечињата што сакаат денот да го започнат со нешто солено.

Затоплете две тортиљи и премачкајте ги со крем сирење, па во нив распоредете листови зелена салата, листови кашкавал и листови шунка.

Направете ролати и прикачете ги со чепкалки за заби, па засечете мали ролнички со ноже.

Додадете исечкан зеленчук и овошје и ужинката е подготвена.

Пица ѓевречиња

Земете едно ѓеврече и со ноже пресечете го на половина.

Премачкајте ги двете крукчиња со малку сос од домати, ставете парчиња шунка или друг сувомеснат производ по избор на вашето дете, додадете зелечнук по избор и кашкавал.

Ставете ги во рерна да се потопечат на температура од 190 степени Целзиусови, додека да се стопи кашкавалот.

Заедно со пица ѓевречињата додадете исечкано овошје и зеленчук или сок/вода.

Сендвич со ѓеврече

Доколку немате време за правење пица ѓевречиња, можете да направите ладен сендвич од него. Засечете го на половина и премачкајте го со крем сирење и додадете ги омилените додатоци на вашете дете.

За полесно јадење, можете да го поделите сендвичот на две половинки.

Макарони со кашкавал и путер

Доколку имате време, сварете една порција макарони и исцедете ја. Додека макароните сѐ уште се топли, изрендајте кашкавал, путер и сол и оригано по вкус. Измешајте и ужинката е готова.

Оброкот дополнете го со салата, овошје и десерт по ваш избор.

Б. С. Б. | Црнобело